Ka seng ka ju pynlong tista man la u snem ïa ki Seminar bad Awareness Programme halor kiba bun ki phang kiba ïadei bad ka jingthmu bad thong jong ka Seng. Ha kine ki Seminar la ju wan ai jingkren da ki stad bad riewshemphang kiba la jied khnang. Ki dkhot ka seng, ki khraw pyrkhat ka imlang sahlang, ki nonghikai bad samla pule jong ki skul bad kolej ki ju wan ïashim bynta ha kine ki prokram.

Ka seng ka ju rakhe tista ruh ïa ka sngi seng jong ka, kaba la jer ‘Literary Day’ ha ka 11 tarik Nailur jong man la u snem. Kawei na ki kam kiba kongsan jong ka jingrakhe ïa kane ka sngi ka long ka jingpynkup burom ïa ki samla pule kiba ïoh heh marks tam ha ka sobjek Khasi. Ha kane ka sngi la ju pynlong ruh ïa ki jingpule poetry, ki jingrwai tynrai, ki jingpyllait kot bad kiwei kiwei ki skit ki sker.

Ki Matti:

Ka seng ka la kyntu ïa ki bor pynïaid ka North Eastern Hill University ba kan plie noh ïa ka Khasi Department kum kawei na ki subject pule ha ka kyrdan University. Kumta ka la phah ïa ka shithi sha u Secretary ka University Grants Commission bad sha u Vice-Chancellor ka NEHU ha u snem 1981. Ym slem hadien kane, la plie ïa ka Khasi Department ha NEHU ha kaba u Professor banyngkong jong ka u long u Dr. Radhon Sing Lyngdoh. Mynta ka Khasi kum ka phang pule ka la don haduh ka kyrdan Ph.d ha kane ka skul –bah.

Ka seng ka la ju ïaleh na ka por sha ka por ban pynurlong ïa ka jingdawa jong ka ban pynrung ïa ka ktien Khasi kum kawei na ki ktien ban pyndonkam ha ka synshar khadar. Kane ka jingthmu ka long kaba jop haba ka Sorkar Meghalaya ka la pynbna ha u snem………. ba la pdiang ïa ka ktien Khasi kum ka ‘Associate Official Language.

Ki Thong:

Ka thong kaba khraw bad jingïaleh bakongsan tam eh jong ka Seng ka long ban pynrung ïa ka ktien Khasi ha ka 8th Schedule jong ka Constitution namar ka jingithuh da ka Sorkar India ïa ka ktien Khasi kan wanrah shibun ki jingmyntoi. Ka Seng ka la ïaleh khlem shongthait ïa kane ka kam lyngba ki snem ba la leit.

Kawei pat na ki mat treikam bad thong jong ka seng ka long ban iasyllok bad ki dkhot, ki nongthoh bad ki stad pyrkhat ka ktien ka thylliej bad ka thoh ka tar halor kumno ban pynwandur bad pynryntih ïa ka rukom pyndonkam ïa ki kyntien, khamtam ha kaba thoh ba tar.