Katto katne shaphang ka Khasi Authors’ Society

 Ka Khasi Authors’ Society (KAS) ka dei ka seng ki nongthoh kot Khasi kaba trei na ka bynta ban kyntiew bad pynroi ïa ka ktien, ka litereshor bad ka kolshor Khasi. La seng ïa ka ha ka 11 tarik Nailur (September), 1979 bad ka ‘tien phira ka long “Pynïar ïa ka ktien Khasi”. La seng ïa ka KAS da ki khyndai (9) ngut ki nongthoh kot Khasi kiba kynthup ïa u Prof. H. W. Sten, Babu B. C. Jyrwa, Bah L. G. Shullai, Bah Hughlet Warjri, Bah D. T. Laloo, Bah H. Mylliemngap, Bah Krieshon Rapthap, Bah K. W. Nongrum, bad Bah E. W. Dkhar. Napdeng kitei ki khyndai ngut ki mawdong, satang u Bah K. W. Nongrum uba dang don ryngkat bad ngi haduh mynta.

Da ka jingsdang kine ki khyndai ngut ki rangbah, ka KAS ka roi mynta palat 160 ngut ki dkhot. La pynïar ruh ïa ka jingtreikam da kaba thung ïa ki Shnat treikam (unit) ha kylleng ka Bri u Hynñiew Trep. Haduh mynta ki don hynñiew (7) tylli ki shnat; kaba kynthup ïa ka Shnat Jowai, Khliehriat, Nongstoiñ, Nongpoh, Mawkyrwat, Mairang bad Sohra. Da ka jingïatrei lang, ka Sorkar Meghalaya ka la kyrshan bad ithuh kyrpang ruh ïa ka Khasi Authors’ Society kum ka Seng kaba kyntiew ïa ka thoh ka tar (Sahitya Sabha) ha ka Jylla, kane ka long katkum ka Rai (resolution)  ba la pdiang da ka Meghalaya Legislative Assembly ha ka 27.11.2018.

Ka Khasi Authors’ Society ka don ïa ka thong ban pynïar bad pynriewspah ïa ka ktien nongmei nongpa bad ka literashor Khasi. Man ka snem ka ju pynlong ki prokram bapher bapher kum ki Lympung ïamir-jingtip, ki jingpynshai paidbah, ki jingkren kyrpang, ki jingïakob bapher bapher na ka bynta ki khynnah skul bad ki samla pule ha ki kolej bad university bad kiwei kiwei. Ha kaba pynïar ïa ka thoh ka pule ha ka ktien Khasi, ka seng ka ju pynmih ruh manla ka snem ar tylli ki Thup Jingthoh wadbniah (Journals), kiba kyrteng Ka Thiar ki Nongthoh bad Ka Syngkhong Jingtip. Nalor kitei ki Journals, ka seng ka ju pynmih ruh bun kiwei pat ki kot. Nalor kaba pynïar bad pynroi ïa ka ktien Khasi, litereshor Khasi bad kolshor Khasi. Ka thong ba ha khmat eh jong ka seng ka long ban dawa na ka Sorkar India ban pynrung ïa ka ktien Khasi ha ka Khyrnit baphra jong ka Riti Synshar ka Ri India.

Haba im ka Ktien im ka Jaitbynriew