Ha ka 16 tarik Ïaïong, 2026 ka CEC jong ka Khasi Authors’ Society ka la leit ban ïakynduh ïa u Myntri Rangbah ka Jylla, Shri Conrad Sangma hadien ba la khot ïa kren ïa ka Seng halor ka jingdawa ban ithuh noh ïa ka ktien Khasi kum ka ktien Sorkar (official language) ha ka Jylla. Ïa kane ka jingïalang la pynlong ha kamra treikam u Myntri Rangbah ha kaba la don lang ki Symbud Myntri Rangbah ka Jylla kata u Bah Prestone Tynsong bad Bah Sniawbhalang Dhar.

Ha ka jingïakren u Conrad u la ïathuh ba ka Sorkar ha ka jingïalang kynhun Myntri mynta ka sngi, ka la pdiang ban ithuh noh ïa ka ktien Khasi kum ka ktien sorkar ha ka Jylla Meghalaya, ryngkat ka ktien English bad Garo. Ïa kane ka jingithuh ïa ka ktien, la pdiang da ka ordinance ba la tip da ka “The Meghalaya Official Ordinance, 2026” da kaba bujli noh ïa ka “Meghalaya State Language Act, 2005”. U la pyntip ruh ba ïa kane ka hukum ym pat lah ban pyntreikam katbym pat soi da u Lat ka Jylla. Kumta u la kular ba tang shu wan u Lat na ka jingphah sumar na Delhi un sa leh ïa kaba donkam. Ha kaba ïadei bad kane u Bah Prestone u la pynshai ruh ba ïa ka aiñ kaba pura yn sa rah ha ka Dorbar Thawaiñ ka ban sa long ha u bnai Nailar lane Nailur. Nangta u la kyntu ruh ïa ka KAS ban ïatreilang bad ka Sorkar ha kaba pynbit pynbiang ïa ka kam, khamtam eh ha ka por ba shna ïa ki kyndon jingpyntreikam ïa ka aiñ bapura. Halor kane ka Seng lyngba u President, Prof. D.R.L. Nonglait u la pynpaw ka jingkhublei ïa ka sorkar kaba la shim ïa kane ka sienjam kaba donkam eh ban pynneh pynsah ïa ka ktien Khasi hadien 54 tylli ki snem ba ngi la ïoh la ka jong ka jylla. Ha kaba ïadei bad kane la pynpaw ruh ba ka Seng ka kloi ban ïatreilang bad ka Sorkar ha kano kano ka por ba ka donkam, khamtam eh na ka bynta ban pynroi, pynïar bad kyntiew ïa la ka ktien nongmei nongpa.