Ha ka 22tarik Jylliew, 2026, ka Khasi Authors’ Society Shnat Sohra ka la rakhe ïa ka Sngi u Thomas Jones da kaba ïatreilang bad ka Thomas Jones School of Mission, Sohra. Ha kane ka sngi la pynlong da ka Jingïakob Ïatainia (debate) na ka bynta ki skul halor ka phang bad ka jingkren kyrpang halor ka phang “U Synñiang u Thomas Jones sha ka Jaitbynriew Khasi”. Ïa kane ka lympung la pynlong ha ka Thomas Jones School of Mission, Sohra ha kaba la ïashim bynta da ki Dkhot ka KAS, nonghikai, samla pule, nongthoh, kynhun Seng Bhalang bad kiwei kiwei; ryngkat ki nongpathai khubor.

Ha ka sienshong kaba nyngkong, la don 12 ngut ki samla pule kiba la ïashim bynta ha ka Jingïakob Ïatainia halor ka phang “Ka Jingïabeh ïa ka ktien Phareng ka pynduhbor noh ïa ka ktien Khasi”. Ki skul kiba la ïashim bynta da kaba phah mar ar ngut ki samla pule ki long; (1) Cherra Presbyterian Secondary School, Nongsawlia (2) St. John Bosco Girls’ HS School, Sohra (3) Sohra Academy HS School, Maraikaphon (4) RKM HS School, Sohra (5) Sohra Govt. HS School, Saitsohpen bad (6) Thomas Jones School of Mission. U shongknor ha kane ka jingïakob u long u Bah N. F. Wahlang, TJSM bad ki nongbishar ki kynthup ïa ka Kong R. Marbaniang, Bah B.L. War bad Dr. Walter Thabah. Kane ka jingïatyrko ka ong kaba sngewtynnat bad don jingmuh ha kaba ki samla ki sei la ki sap bad ki nia ki jutang ban pynshisha katkum ka liang pyrshah ne kyrshan. Ha ka jingbishar kaba khatduh ka Samla Iarilang Jeengaph na St. John Bosco Girls’ HS School, Sohra ka la ïohrah ïa ka nam kum ka nongïatainia batbit tam.

Ha ka sienshong kaba ar, u Bah Mark. A. Challam, SDO, Sohra Civil Sub-Division u la wan ban kyrkhu kyrdoh ïa ka jingïalang kum u kongsan. U Bah Challam u la ai khublei ïa ka KAS Shnat Sohra kaba la pynlong ïa kane ka lympung bad u ngeit skhem ba lyngba kane ka jingrakhe kan ktih ïa ka jingmut jingpyrkhat ki samla ban ieit ïa la ka ktien nongmei nongpa.  La ïoh ruh ka jingkren kyrpang halor u synñiang u Thomas Jones da ki riewshemphang kata u Rev. A Dopri, Principal, TJSM, bad Bah Phrikshon Kharshiing, Finance Secretary, KAS. Kiba la pynkynmaw ïa ka jingtrei bad u synñiang u Thomas Jones sha ka jaitbynriew Khasi. Hadien ka jingkren la ïoh ka jingsam khusnam sha ki jongjop ïa ka jingïatainia bad la pynrhem shuh shuh ïa ka jingrakhe da ka jingrwai na ki samla pule ka Sohra-Twa Presbyterian Sec. School bad Sohra Academy HS School.

Ha ka 28tarik Jymmang, 2026 ka Seng ki Nongthoh Kot Khasi (KAS) ka la pynlong ïa ka Dorbar Pyllun ha Synod College, Shillong. Ha kane ka Dorbar kaba ju pynlong shisien shisnem, la pynsngew ïa ka kaiphot treikam jong ka snem 2025-2026. Halor ka kaiphot, ka Dorbar ka pynpaw ka jingsngewnguh ïa ki Nongkitkam bad ki dkhot baroh kiba la trei shitrhem ha ka ban pynïaid shaphrang ïa ki ka kam Seng. Khamtam eh ka jingithuh ïa ka ktien Khasi kum ka ktien sorkar (official language) ha ka jylla Meghalaya, ka la long shisha u mawmer u ban ïai sah kynmaw junom ha ka jingïaid lynti ka Seng bad ka jaitbynriew Khasi.

Kum shi bynta ban pynïar ïa ka ktien Khasi shabar na la ka jong ka jylla, ka Dorbar ka la rai ruh ban pynlong biang ka Lympung ïamir-jingtip (National Seminar) mynta u snem ha nongbah New Delhi. Nangta la ïakut ruh ban rakhe ïa ka Jubili Rupa (1979-1929) jong ka seng ha ka snem 2029 bad na ka bynta kane la pynkhreh ïa ka jingpruid dak kaba bniah khnang ban pynïoh ka jingrakhe kaba I shongkun.

Ha ka Dorbar, la ïoh ruh ban pynithuh bad pdiang ïa ki Dkhot kiba dang pynïasoh thymmai sha ka Seng da u Vice President KAS, Dr. K.D. Ramsiej bad baroh ki don 4 ngut; kiba kynthup ïa I Dr. Medari Jania Tham, Rev (Dr.) Shanbha Hayong, Kong Esabell Kharlukhi bad Kong Wadlang Mylliem. Ha ka jingkren pdiang ïa ki dkhot thymmai, u Dr. K. D. Ramsiej u la ong ba watla ha kane ka snem ka seng ka la duh ïa u Bah Anthony Jala bad Bah E. Weston Dkhar uba long u Nongseng bad President barim ka KAS, hynrei ka jingpynïasoh thymmai ki 4 ngut sha ka Seng kan ïarap ban pyntyllun stet ïa ki mat treikam ka seng bad ban nang pynkhlaiñ ïa ka thoh ka pule Khasi.

Ha kane ka Dorbar, kum ka jingburom ïa ki Nongseng la ïoh ruh ban pynkup burom ïa u Bah Kitbor W. Nongrum, uwei napdeng ki khyndai ngut ki nongseng uba dang don mynta bad uba la noh synñiang shibun sha ka seng kum u nongkitkam bad lyngba ki kot kiba u la thoh palat spah tylli. La sam ruh ïa ka syrnot nam sha ka Dr. Balarishisha Nongkynrih dkhot KAS kaba la pyndep ïa ka kyrdan Ph.D hapoh ka snem.

Ha ka sienshong kaba ar, la pynlong ïa ka ka Lympung ki Nongthoh ha kaba u Bah Phrikshon Kharshiing, Finance Secretary KAS u la shim ïa ka bynta kum u shongknor. Ha kane ka sienshong la ïoh ka jingkren kyrpang halor ka phang “Ka kheiñ kur Kheiñ kha ha ki khun u Hynñiew Trep bad ka jinglong kyrpang ka jaitbynriew Khasi” bad u riewshemphang u long u Prof. K. S. Nongkynrih. Nalor ka jingkren la ïoh ruh ka jingrwai na ka Kong Evanisha Pathaw Dkhot KAS bad ka jingpule poitri da ki dkhot kita ki long Bah Wansalan E. Dhar bad Kong Lucky Kharpuri. La pynphuh pynphieng ruh da ka jingpynlait paidbah ko nongkitkam ïa ka kot “Na Tduh I Dohnud (Thup – II)” ba la thoh da u Dr. Sevendar Dkhar uba dei u dkhot ka Seng.