Ka 27.4.2026 kan ïai long ka sngi sah jingkynmaw pateng pakit ha ka jingïaid lynti ka KAS bad ka jaitbynriew Khasi. Ha kane ka sngi u Lat ka Jylla, Shri C.H. Vijayashankar u la soi ïa ka Ordinance kaba la tip kum ka The Meghalaya Official Languages Ordinance, 2026 kaba la pynbna ïar ha ka The Gazette of Meghalaya. Ha kane ka hukum la kdew shai ba ka ktien Khasi kan dei noh kawei na ki ktien sorkar (official language) ha ka Jylla Meghalaya, ryngkat ka ktien English bad Garo, da kaba bujli noh ïa ka Meghalaya State Language Act, 2005. Kane ka hukum ka dei ruh kaba la dep pdiang ha ka jingïalang kynhun myntri ka sorkar Jylla ha ka 16.4.2026.

Halor kane ka jingseisoh jong ka jingdawa, ka KAS ïoh ban lum kyrkieh ïa ka jingïalang jong ka KAS ha ka 28.4.2026 ha ophis treikam kum ka dak ka jingsngewnguh bad ka jingaikhublei ïa baroh kiba kyrshan ïa ka Seng ha kane ka jingdawa kaba kynthup ïa ki Nongïalam KAS, ki dkhot CEC, ki shnat, baroh ki dkhot KAS, ki sengbhalang, ki lad pathai khubor bad kiwei kiwei kiba don bynta ban kyrshan ïa ka jingdawa; khamtam eh ïa ka sorkar jylla kaba la sngap ïa ka jingdawa jong ka seng. Kane ka jingseisoh ka long ruh hadien ba ka Jylla Meghalaya ka la kynjoh palat 54 tylli ki snem naduh ba ka la ïoh la ka jong ka jylla ba pura.

Ha ka jingïalang la pynsngew ba kane ka dang dei tang ka aiñ rew bad donkam ban pynkhlaiñ shuh shuh ïa ka jingdawa haduh ban da pynlong aiñ ba pura da ka Ïing Dorbar Thaw-aiñ ka Jylla bad ban buddien ruh ïa ka jingpynkhreh ka sorkar haba pyntreikam ïa ka aiñ ha ka Jylla.