Ka jingkyntiew ïa ka ktien Nongmei Nongpa:

Ka thong jong ka Khasi Authors’ Society ka long ban pynïar bad kyntiew ïa ka ktien nongmei nongpa bad ka litereshor Khasi. Ha ki por baroh, ka seng ka ju pynlong ki prokram bapher bapher kum ki Lympung ïamir-jingtip, ki jinghikai, jingpynshai paidbah, jingkren kyrpang, jingïakob bapher bapher na ka bynta ki samla pule bad ki jingïalang kynmaw burom ïa ki nongthoh kiba la kyntiew ïa ka ktien Khasi. Ha ka 11tarik u bnai Nailur kaba dei ka sngi lyngkhuh dap snem, ka seng ka ju pynlong ka jingïalang kaba heh ha kaba la tip kum ka sngi jong ka thoh ka pule (Literary Day). Kum ha kane ka sngi la ju pynlong ki prokram bapher bapher da kaba ai khusnam sha ki samla pule kiba heh duh ki mark ha ka subjek Khasi naduh Klas X haduh MA, ka jingpule poitri, ka jingpyllait paidbah ïa ki kot jong ki dkhot KAS, ki Lympung Ïamir-jingtip bad kiwei.

Nalor kaba pynïar bad pynroi ïa ka ktien, litrershor bad kolshor Khasi. Sa kawei ka thong kaba ha khmat eh jong ka seng ka long ban dawa na ka sorkar India ban pynrung noh ïa ka ktien Khasi ha ka Khyrnit baphra jong ka Riti Synshar ka Ri India. Kumta na ka por sha ka por la ju pynlong ki jingpynshai paidbah ha kylleng sawdong khnang ban pynphriang ïa ka jingtip, halor ka jingdonkam ban ithuh noh ïa ka ktien Khasi da ka Riti Synshar. Hooid, da ka jingïatreilang jong baroh ki dkhot ka jaitbynriew la lah ban pynkohnguh ïa ka Meghalaya Legislative Assembly ban pdiang ïa ka rai (resolution) ban phah sha ka Sorkar Pdeng ban pynrung noh ïa ka ktien Khasi ha ka khyrnit ba phra jong ka Riti Synshar ha ka 27.11.2018. Nangta ha ka 27.4.2026, u Lat ka Jylla, Shri C.H. Vijayashankar u la soi ïa ka Ordinance kaba la tip kum ka The Meghalaya Official Languages Ordinance, 2026. Ha kane ka hukum la kdew shai ba ka ktien Khasi kan dei noh kawei na ki ktien sorkar (official language) ha ka Jylla Meghalaya, ryngkat ka ktien English bad Garo, da kaba bujli noh ïa ka Meghalaya State Language Act, 2005. Ka seng ka khmih lynti ba ngin nang kynjoh shuh shuh sa kiwei ki mawjam ha ka ban pynroi bad pynneh pynsah ïa la ka ktien bad ka jaitbynriew.