Ka Central Executive Committee jong ka Seng ki Nongthoh Khasi (KAS) ha ka 19.3.2026 ka la rai ban pynlong ka jingpynshai paidbah na ka bynta ban pynjur ïa ka jingdawa ban ithuh noh ïa ka ktien Khasi ha ka Jylla Meghalaya. Kane ka long hadien ka jingpynkynmaw bunsien sha ka sorkar Jylla. Ha ka jingïakut la rai skhem ban ym leit pynkynmaw lane buddien shuh na ka sorkar, hynrei yn leit pynsngew beit noh ïa kane ka kam ha u paidbah, kane ka long ruh katkum ka jingïakut ka Dorbar Pyllun kaba la long ha ka 7.6.2025. Kane ka jingthmu ka long ban pynbor ïa ka sorkar jylla ban ithuh noh ïa ka ktien Khasi kum ka ktien sorkar (official language) ha ka Jylla Meghalaya namar ar snem tam ngim shym ïohi kano kano ka dak jingkyrmen halor kane ka jingdawa kaba shong nia bad shong hok.
Kum ban shu pynkynmaw, kane ka jingdawa ka la sdang naduh u snem 2023. Hadien ba ka Seng ka la leit buh ïa ka dorkhas ha u Myntri Rangbah ka Jylla, Shri Conrad Sangma ha ka 16.10.2023. Nangta la phah ruh ka shithi jingpynkynmaw ha ka 26.2.2025 bad khnang ba ka jingdawa kan khlaiñ la thoh ruh ka shithi jingkyrpad sha baroh 35 ngut ki MLA Khasi ban buddien ïa ka kam bad ban ïakren lem ha Ïing Dorbar Thaw-aiñ. Khnang ba ka jingdawa kan urlong, la pynbud sa ka shithi jingkyrpad ha ka 12.8.2025 sha baroh ki seng saiñ pyrthei ha ka jylla ban kin shim khia lem. Phewse kane ka kam ka shu sah kumto khlem don ba kheiñ snep. Watla ka seng ka la pyrshang ban ïai buddien da kaba ïasyllok bunsien bad ki nongmihkhmat, hynrei ym shym la ïoh ruh kano kano ka jubab lane ka jingphah jingtip na ka sorkar bad wat ha ka Ïing Dorbar Thaw-aiñ ka Jylla ym don ba kren lane pynsngew.
Kumta ka KAS kam banse ban phai khmat sha u paidbah uba ju ai ka jingkyrshan ïa ka seng ha ki por baroh. Ïa kane ka jingpynshai paidbah la pynlong ha ka taïew baar bad balai u bnai Ïaïong 2026 da kaba pynlong ha baroh hynñiew tylli ki jaka ba don ki Shnat ka KAS. Ka la don ruh ka jingïakut lada ka sorkar ka dang sngap mynthi yn bteng ban pynlong ka jingpynshai & jingïaid paidbah kaba heh ha Nongbah Shillong ha ka taïew bakhatduh u bnai Ïaïong 2026. Na kane ka jingpynshai, lyngba ka sur u paidbah ka sorkar ka la sngap ïa ka jingdawa bad ha ka jingïalang kynhun myntri ka sorkar jylla ha ka 16.4.2026 la pyntip sha ka Seng ba la pynlong ktien Sorkar (official language) ïa ka ktien Khasi ha ka Jylla Meghalaya. Halor kane, ka seng ka ai khublei ïa baroh kiba la don bynta ban kyrshan ïa ka jingpynshai paidbah, khamtam eh ïa ki Shnat kiba la shim jingkitkhlieh ban pyndep ïa la ka kamram kumba la shaniah. Ki jingpynshai paidbah ba ka KAS ka la ïoh ban pynlong na ka bynta kane ka jingdawa ki long hynriew sien bad ka wei ka jingïalang ai khublei ha Sohra hadien ba la ïoh ka jingdawa. Ki jaka bad ki nongïashim bynta ha ki jingpynshai paidbah ki long kumne;
| Tarik & Jaka | Nongpynlong | Shongknor | Riewshemphang |
| 8.4.26 ha Ïew Nongstoiñ | KAS Shnat Nongstoiñ | Bah Witting Mawsor | Prof. D.R.L. Nonglait, Dr. R.P. Kharshiing & ki Sengbhalang |
| 11.4.26 ha Ïawmusiang, Jowai | KAS Shnat Jowai | Bah Nolman Gassah | Prof. D.R.L. Nonglait, Dr. Solony Bareh & ki sengbhalang |
| 13.4.26 ha Wika Parking Lot, Khliehriat | KAS Shnat Khliehriat | Dr. Davidson Diengdoh | Prof. D.R.L. Nonglait, Dr. Phervision Nongtdu, Dr. Khampher Phawa & ki sengbhalang |
| 14.4.26 ha Ïew Umsning | KAS Shnat Nongpoh | Bah Cosmos Rynshon | Prof. D.R.L. Nonglait, Dr. M.M. Khymdeit, Dr. R.P. Kharshiing bad ki sengbhalang |
| 14.4.26 ha phyllaw Tirot Sing Memorial Hall, Mairang | KAS Shnat Mairang | Dr. Overland Lyngdoh | Prof. D.R.L. Nonglait, Prof. Desmond L. Kharmawphlang bad ki sengbhalang |
| 16.4.26 ha Ïew Mawkyrwat | KAS Shnat Mawkyrwat | Bah Colonel Syiemlieh | Prof. D.R.L. Nonglait, Dr. K. D. Ramsiej bad ki sengbhalang |
| 18.4.26 ha Madan ïing Dorbar Saitsohpen, Sohra | KAS Shnat Sohra | Bah B. V. Rymmai | Prof. D.R.L. Nonglait, Dr. K.D. Ramsiej, Bah Banlam Lyngdoh bad ki sengbhalang |
