Ka Khasi Authors’ Society ha ka Dorbar kaba la long ha ka 28.4.2018 ka la ïakut skhem ban nang pynkhlaiñ ïa ka jingdawa ban kyntu ïa ka sorkar Jylla ban wanrah noh da ka rai (resolution) halor ka ktien Khasi. Katlah katïai, ka Seng ka la pyrshang katba don ka lad baroh ban pynurlong ïa kane ka kam kaba la angnud la slem da ka jaitbynriew. Da ka jingïatrei lang, kane ka kam ka la urlong ha ka Dorbar Thawaiñ jong ka Sorkar Jylla ha ka 27.9.2018. Ha kaba la pdiang ïa ka Rai (resolution) ban kyrpad ïa ka Sorkar India ban ithuh noh ïa ka ktien Khasi & Garo ban pynrung ha ka Khyrnit baphra jong ka Riti Synshar ka Ri.

Halor ka rai (resolution) ka Executive Committee ha ka jingïakynduh kaba kyrkieh ha ka 27.9.20 ka la pynpaw ka jingsngewnguh ïa ka sorkar jylla bad ïa baroh 60 ngut ki MLA kiba la kyrshan bad pdiang ïa ka rai (resolution) hadien ka jingkhmih lynti kaba la slem bha. Hynrei haba khmih bniah halor ka rai, la don ar tylli ki dieng pyngkiang (hurdles) kiba lah ban long pynban ka jingjynthut ïa ka Ktien Khasi ba kan ïoh jingithuh; kita ki long (i) Ka Khasi bad Garo kam dei ka Medium of Instruction haduh Higher Secondary lane Higher Education bad (ii) Ka Jylla kam pat don ïa ka Sahitya Sabha. Ka Executive Committee ha kane ka Jingïalang ka la ïakut ban dawa na ka Sorkar Jylla ban khot da ka Dorbar Kyrpang (Special Session) ban pynkylla noh ïa kane ka Rai jong ka Dorbar Thawaiñ halor kine ki jingpynshai; (i) Ba ka Ktien Khasi bad Garo ki dei ki medium of instruction ha ki jaka pule. Khamtam ïa ka Ktien Khasi la hikai ïa ka naduh ka kyrdan Primary haduh kyrdan Ph.D bad (ii) Ban kyrpad ïa ka sorkar jylla ban ithuh noh ïa ka Khasi Authors’ Society kum ka Sahitya Sabha hapoh ka jylla namar ba ka kam jong ka Seng ka ïa syriem bad ka rukom trei kam kiwei ki sahitya sabha ha kiwei ki jylla, ha kaba ïa ki ruh la kyrshan pisa da ka Sorkar Jylla kumba long ïa ka Seng.

Halor kane ka Seng ka la buddien da kaba kynduh ïa u Lamphang ka Iing Dorbar Thawaiñ, Myntri Rangbah ka Jylla bad kiwei. Ha ka jingbud dien kaba khah khah, ha ryngkat ki jingpynbud da ki shithi; ka Sorkar Jylla ka la pdiang ïa kane ka jingdawa. Kumta ha ka 27.11.2018 ka Sorkar Jylla ka la pynlong ïa Dorbar Kyrpang ban pynbha biang ïa ka rai (resolution) bad baroh 60 ngut ki MLA ki la pdiang ïa ka Rai ba thymmai baroh ar tylli kumba la dawa da ka Seng. Kane ka long ka jingjop kaba khraw ïa ka jaitbynriew bad kan dei ruh u mawmer u ban pynsah jingkynmaw shi junom ha ka jingïaid lynti ka Seng ban kynjoh sha kane ka thong. 

Ha ka 11.9.2018, ka Khasi Authors’ Society (Ka Seng ki Nongthoh Khasi) ka la rakhe ïa ka lyngkhuh dap snem ba 39 ïa kaba la ju khot da ka Literary Day ha ryngkat ka Lympung Ïamir-jingtip (Seminar) halor ka phang “Haba im ka ktien im ka jaitbynriew” ha Khasi National Dorbar Hall, Shillong. Ha kane ka sngi u Dr. Donkupar Roy, Lamphang ka Ïing Dorbar Thaw Aiñ ka Jylla u la long u Kongsan bad u Bah S. K. Sun, MLA ka Mawphlang Constituency kum u Symbud Kongsan. Nalor ki jingkren, ki kongsan ki la ïoh ruh ban pyllait paidbah ïa ki saw tylli ki kot ba la thoh da ki dkhot; i) U Synñiang ki Nongthoh kot Khasi (Vol.VII): Bah Krieshon Rapthap bad Bah Hamarbabiang Mylliemngap – Bah K.W. Nongrum. ii) Ki saisnier syrdoh tyngier – Bah Andreas Sun. iii) Ka kheiñkur kheiñkha Khasi – Bah Raphael Warjri bad iv) Haba Im Ka Ktien Im Ka Jaitbynriew – Khasi Authors’ Society. Ha kane ka lympung la ïoh ruh ka jingkren na ki riewshemphang; Bah K. W. Nongrum, Dkhot KAS halor ka phang, “U Synñiang ki Nongthoh: Bah Krieshon Rapthap bad Bah Hamarbabiang Mylliemngap” bad na u Bah R.G. Lyngdoh, Former Vice Chancellor jong ka Martin Luther Christian University, halor ka phang, “Ka Ktien bad ka Jingïalong Kawei ka Jaitbynriew”. La ïoh ruh ban sam ïa ka Khusnam Khasi Authors’ Society 2018 sha ki samla kiba ïoh heh duh ki mark Khasi ha ki jingpule bapher bapher.