Ha ka Dorbar bashisien shi snem jong ka Khasi Authors’ Society kaba la long ha ka 19.5.2018 ha Shillong College, Shillong, u President ka Seng, Dr. D. R. L. Nonglait ryngkat u Vice President, Dr. K. D. Ramsiej ki la pdiang sngewbha ïa u Rev. G. R. Sancley uba la dap 90 snem ka rta bad uba la pynïasoh ïalade kum u dkhot ka KAS lem bad 13 ngut kiwei pat ki dkhot bathymmai, kiba kynthup ïa u Rev. Dr. O. L. Snaitang, Prof. Antoinette Kharmalki, Dr. Rollingstone Wankhar, Dr. Barrylia Mesha Wolflang, Dr. Solony Bareh, Dr. Natalie Joanne Diengdoh, Dr. Joy Fully Sawkmie, Kong Sweety Diengdoh, Bah John Robert Khongjee, Bah Wansalan E. Dhar, Bah Pynjopthiaw Nongrum, Bah Kolan Jones Diengdoh, bad Bah Bikram L. Nonglait.
Ha ka jingkren pdiang ïa ki dkhot ba thymmai u Dr. D. R. L. Nonglait, u la ong ba watla ha k ar snem ba la dep ka seng ka la duh noh ïa ki 6 ngut ki dkhot ba kham rangbah jong ka seng, hynrei ka jingrung thymmai ki 14 ngut kiwei pat ki dkhot kan ïarap ban pyntyllun stet ïa ki mat treikam ka seng. Lah ban kdew hangne ïa ki dkhot ka seng ba la khlad noh ha kine ki ar snem ba la leit ki long; Rev. Fr. Sylvanus Sngi Lyngdoh, Dr. Hamar B. Kharlukhi, Bah Kreishon Rapthap, Bah Hamarbabiang Mylliemngap, Bah L. H. Pde bad Bah Raijesh K. Lyngdoh. Kumta ha kane ka Dorbar, kum ka dak ka jingburom ïa kine ki dkhot ba la khlad noh la pynlong ka jingsngap jar 2 minit.
Ha kane ka dorbar, ka KAS ka la rai ruh ban ïaleh tyngeh ban pynrung ïa ka Ktien Khasi ha ka Khyrnit kaba phra (Eight Schedule) ka Riti Synshar ka Ri India. Hadien ka jingïatai kaba slem halor kane ka mat ha kaba la ïashim bynta shitrhem da baroh ki dkhot, ka dorbar ka la rai ban pynlong ïa ki seminar bad ki jingpynshai paidbah ha kylleng ki jaka hapoh ka Bri u Hynñiew Trep. Hadien kata yn pynlong ïa ka jingïalang pynshai paidbah kaba heh ha Shillong. La rai ruh ban ïa trei lang bad ki seng treimon sngewbha kiba hapoh ka Jylla bad shabar ka Jylla kumjuh; bad ban kyntu ïa ki nongmih khmat khamtam eh ïa u Myntri Rangbah ban shim noh ia ka rai (resolution) ban dawa na ka Sorkar India ban pynrung noh ïa ka ktien Khasi ha ka khyrnit kaba phra ka Riti Synshar. Ka Seng ka la khreh ruh ban ïakynduh ïa ki Myntri Sorkar Pdeng, lada ka Sorkar Jylla ka la phah ïa kane ka kam sha ka Sorkar Pdeng.
Ha kane ka sngi la ïoh ruh ban pynthymmai ïa ki nongkitkam bad ki dkhot EC na ka bynta ka samoi treikam jong ka snem 2018 – 2020 kumne :
President : Dr. D. R. L. Nonglait
Vice President : Dr. K. D. Ramsiej
General Secretary : Bah Ronald P. Kharshiing
Joint Secretary : Dr. Rollingstone Wankhar
Treasurer : Prof. Badaplin War
Editor : Dr. Barrylia M. Wolflang
Auditor : Bah N. R. Gassah
Ki Dkhot Executive Committee : Prof. Streamlet Dkhar, Dr. Ester J. Shongwan, Bah K. W. Nongrum, Bah P. Kharshiing, bad Bah A. Sun
Lyngba kane ka khubor, ka KAS ka ai khublei ïa baroh ki paidbah nongshong shnong ka Bri u Hynñiewtrep bad ki Seng bapher bapher kiba la kyrshan ïa ka seng ha ki por baroh ha kane ka jingïaleh ban pynrung ïa ka ktien Khasi ha ka Khyrnit kaba phra jong ka Riti Synshar ka Ri India. Mynta ka seng ka wer bad khot biang ïa ka jingïasnoh kti lang jong baroh ki nongthoh kot, ki nongthoh kotkhubor, ki nonghikai, ki seng saiñ pyrthei, ki seng niam, ki seng treimon sngewbha bad ki paidbah baroh, khnang ban pynurlong ia kane ka jingdawa. Shisien ba ka ktien ka la ïoh ïa ka jingithuh bad jingïada da ka Riti Synshar ka Ri, yn ym lah shuh mano mano ruh ban pyndam ïa ka jinglong kyrpang ka Jaitbynriew.
