Rai KA KAS BAN LEIT SHA U PAIDBAH LADA KUMAN KA SORKAR BAN pynlong ktien Sorkar ïa ka ktien khasi ha ka jylla

Ka Khasi Authors’ Society (ka Seng ki Nongthoh Kot Khasi) ha ka 7tarik Jylliew, 2025 ka la pynlong ïa ka Dorbar Pyllun ha Ïing Dorbar Shnong Jaiaw Shyiap – Lumpyllon, Shillong. Ha ka Dorbar la ïoh ban pynsngew ïa ka kaiphot treikam jong ka Seng na ka bynta u snem 2024-2025. Halor ka kaiphot, ka Dorbar ka pynpaw ka jingsngewnguh ïa ki Nongkitkam bad ki dkhot baroh kiba la trei shitrhem ha ka ban pynïaid shaphrang ïa ki ka kam Seng.

Ha ka Dorbar la shim ïa ka rai ban bteng ka jingdawa na ka Sorkar Jylla ban ithuh noh ïa ka ktien Khasi kum ka ktien Sorkar (Official Language) ha ka Jylla kaba la dawa naduh u snem 2023 bad lada ka Sorkar ka kuman ïa ka jingdawa ka Seng kan leit noh sha u paidbah. Nangta ban bteng shuh shuh ka jingpynshai paidbah halor ka ktien Khasi bad ka jingmyntoi lada ka ktien Khasi ka ïoh jaka ha ka Khyrnit baphra. Na ka bynta ka jingdawa na ka Sorkar India, ka Seng ka shaniah ha ka Central Executive Committee, KAS ban nang buddien.  

Ha kane ka Dorbar, la ïoh ruh ban pynithuh bad pdiang ïa ki Dkhot thymmai ka Seng da u President KAS, Prof. D.R.L. Nonglait bad baroh ki don 11 ngut; kiba kynthup ïa u Bah Kitbok Nongkhlaw, Dr. Badahunshisha Jana, Bah Banjop Leo Gregory Kharmalki, Kong Frugiferous Diengdoh, Kong Jennifer Lyngkhoi, Kong Elizabeth Shylla, Dr. Heipor Uni Bang, Dr. Herina Dohtdong, Dr. Rosa Mystica Mawlong, Bah Rangkitbok C. Dohkrut bad Kong Evanisha Pathaw. Ha ka jingkren pdiang ïa ki dkhot thymmai, u Prof. Nonglait u la ong ba watla ha kane ka snem ka seng ka la duh ïa u Bah Maurice G. Lyngdoh u President barim ka KAS, hynrei ka jingpynïasoh thymmai ki 11 ngut sha ka Seng kan ïarap ban pyntyllun stet ïa ki mat treikam ka seng bad ban nang pynkhlaiñ ïa ka thoh ka pule Khasi.

Ha kane ka Dorbar la ïoh ruh ban ai syrnot nam sha ki 2 ngut ki Dkhot ka Seng kiba ïoh ïa ka kyrdan Doctorate hapoh ka snem, kaba kynthup ïa u Rev. (Dr.) Iohborlang Kharshiing bad u Sevendar Dkhar. Kum shi bynta ban pynkhlaiñ ïa ka kam thoh katkum ka jingïaid ka por, khamtam eh ïa ki phang kiba ktah ïa ka imlang sahlang. La ïoh ruh ka jingkren kyrpang na u Prof. D.R.L. Nonglait halor ka phang; ‘Ka Litereshor bad ka bishar bniah’ bad (2) u Slendar Dkhar halor ka phang; ‘Ki snap Jingshisha ka Imlang sahlang ha Ka Jyrsieh Longbriew’.

Ha ka sienshong kaba ar, ka Dorbar ka la ïoh ruh ban pynthymmai ïa ki Nongkitkam bad ki Dkhot ka Central Executive Committee na ka bynta ka samoi treikam 2025 – 2028 kumne harum;

            Ki Dkhot ka Central Executive Committee:

1. Prof. Streamlet Dkhar
2. Prof. Esther J. E. Shongwan
3. Prof. Badaplin War
4. Prof. Desmond L. Kharmawphlang
5. Bah Raphael Warjri
6. Bad baroh ki President na ki hynñiew tylli ki Shnat ka KAS

Auditors: (1) Dr. Davidson Diengdoh bad (2) Dr. Khampher Phawa

Ka Seng ki Nongthoh Kot Khasi (KAS) ka la rakhe ïa ka Sngi ka Thoh ka Pule (Literary Day) ha Seminar Hall, Directorate of Arts & Culture, Shillong ha ka 11.09.2020. Ha kane ka jingrakhe la pynlong da ka jingïalang kaba lyngkot bad khyndiat ngut ki nongïashim bynta namar ka jingpyrkhing ka Sorkar ban ïalum paidbah halor ka jingdon ka khlam jingpang Covid-19 (Lockdown). Ha kane ka sngi kiba ai jingkren ki long Prof. D.R.L Nonglait, President Khasi Authors’ Society, Bah A. L. Hek, Myntri ka Arts & Culture jong ka Sorkar Jylla kum u Kongsan bad u Bah Titosstarwell Chyne, CEM ka KHADC, Shillong kum u Symbud Kongsan. La synran ryngkat ïa kane ka jingïalang da u Bah W. Nongsiej, Director, Arts & Culture jong ka Sorkar Meghalaya bad katto katne napdeng ki dkhot ka Seng. Ha ka jingïalang ki kongsan ki la ïoh ruh ban pyllait paidbah ïa ki lai tylli ki kot jong ki Dkhot: i) Ka Sor Shillong – Bah K.W. Nongrum, ii) Ki Sur Mieng Ka Ri Umsnam – I – Babu Andreas Sun bad iii) Ka Jingkyntip Na Ka Kotbah – Samla Hamles Mylliem Umlong bad la ïoh ruh ban pynshngaiñ ïa ka jingïalang da ka jingrwai na u Kaitor ba paw jong ka Ri Khasi U Babu Chosterfield Khongwir.