Ka Dorbar kyrpang jong ka KAS kaba la long ha ka 19.10.18 ka la Rai ban don noh ki Shnat (unit) ha kylleng ki jaka kiba la don lypa ki dkhot. Halor kane la thung Hynñiew (7) tylli ki shnat ha kylleng ka Ri Khasi kiba la don lypa ki dkhot ka seng, kita ki long ka Shnat Nongstoiñ, Mawkyrwat, Jowai, Khliehriat, Nongpoh, Sohra bad Mairang. Namar ba ka dang dei ka sien kaba nyngkong, ïa ki nongkitkam la jied hi da ka Executive Committee kaba kynthup ïa u President, Vice-President, Secretary, Joint Secretary, bad Treasurer. Ïa kine ki shnat ka Seng ka la ïoh ruh ban wan pynskhem bad la ïakut ruh ba ha ki snem ban wan ka Shnat kan sa jied hi ïa ki nongkitkam bad ki dkhot .
Ka Khasi Authors’ Society (Ka Seng Ki Nongthoh Khasi) ka la rakhe ïa ka Literary Day kaba dei ka lyngkhuh dap snem ba 40 jong ka Seng da kaba pynlong lang ruh ïa ka Lympung Ïamir-jingmut (Seminar) halor ka phang “Ka Tip-briew tip-Blei bad ka Tip-kur Tip-kha ha u Khasi” ha Khasi National Dorbar Hall, Shillong. Ha kane ka sngi u Bah Paul Lyngdoh, Executive Member, KHADC, Shillong u la long u Kongsan. U Kongsan nalor ka jingkren kyrkhu kyrdoh, u la pyllait paidbah ruh ïa ki lai tylli ki kot ba la thoh da ki dkhot: i) Jylla Meghlaya, ii) Ki Soh Pyni – Bah K. W. Nongrum (iii) Rympei I Mei (poitri) – Bah Deibormi Nongpoh. Ha ka Sienshong – I la ïoh ka jingkren na ki riewshemphang Prof. K. S. Nongkynrih, English Department, NEHU bad Rangbah E. Weston Dkhar, Former President, KAS halor ka phang; “Ka Tipbriew Tipblei ha u Khasi”. Ha ka sienshong – II ki riewshemphang ki long u Prof. S. S. Majaw, Former Vice Principal, Synod College bad Dr. Fabian Lyngdoh, Prof. of Cultural Studies & Community Initiative, MLCU ha kaba ki la kren halor ka phang “Ka Tipkur Tipkha ha u Khasi”. Ha kane ka sngi la ïoh ruh ban sam ïa ka Khusnam KAS 2019 sha ki samla pule, ki kyrteng ki long kumne harum;
