Ha ka 22.6.2018, ka Khasi Authors’ Society ka la leit buh syntiew ha u mot sah kynmaw u Rev. Thomas Jones uba don ha pyllaw ka Synod College, Shillong. Ka jingleit buh syntiew ha kane ka sngi ka long kum ka jingkynmaw burom ïa u Rev. Thomas Jones (u Kpa ki dak thoh Khasi) uba la wan poi ha Ri Lum Khasi ha ka 22tarik Jylliew, 1841.

Kane ka dei ka jingrakhe kaba nyngkong, ha kaba ka sorkar ka la mynjur ban ai shuti ha kane ka sngi burom ïa u Rev. Thomas Jones (Rev. Thomas Jones Day). Ha shuwa ka jingleit buh syntiew, la pynlong ka jingïalang kaba lyngkot ha ka kaba la pynïaid da u Dr. D. R. L. Nonglait, President ka KAS.

Ha kane ka jingïalang la ïoh ka jingkren na u Rev. P. Hynniewta, uba mihkhmat na ka KJP Assembly. Ha ka jingkren u Pastor u la ïathuh ba u Rev. Thomas Jones, u wan ïuh kjat nyngkong ha Ri Khasi ha ka 22tarik Jylliew 1841. Kane ka jingwan poi jong u ka la long ka jingkyrkhu ym tang ïa ka Balang Presbyterian, hynrei ïa ka Jaitbynriew Khasi baroh kawei namar ki dak thoh. Nangta, u Pastor, u ong ruh ba ka dei lyngba ki dak thoh ba la wanrah da U Jones, ba la lah ban pynïatylli kawei ïa ka Ri bad ka Jaitbynriew haduh kine ki sngi. U la pynkynmaw ruh ba ka KJP Assembly, ka la rakhe ïa ka jingdap 175snem jong ka jingwan ka Kospel, ha u snem 2016 bad dei ha katei ka snem, la ïakren ïa ka sorkar Jylla, na ka bynta ban leh burom ïa u Rev. Thomas Jones.

Ha ka jingïalang la ïoh jingkren ruh na u Prof. S. S. Majaw, uwei na ki dkhot ba rangbah ka KAS. Ha ka jingkren u Prof. S. S. Majaw, u la batai ba u Rev. Thomas Jones, u la poi ha Sohra ha ka por lyiur bad tang katto katne u la shim ïa ka rai ban shna ïa ki dak thoh Khasi da ka ktien Sohra, ha kaba la ïarap lem ïa u, da U Duwan Rai bad U Jon Kha Diengdoh. Nangta u la batai ruh ba une u rangbah, u im tang 39snem ha pyrthei, hynrei ki kam jong u pat kiba khraw, da kaba ong; “Ki don ki briew kiba im ha ki snem, ym ha ki kam, katba ki don pat kiba im ha ki kam, ym ha ki snem”. U Prof. S. S. Majaw, u ïathuh shuh shuh ba ka dei ha u snem 1843, ba ki la wan poi sa 3ngut ki mishoneri ha Sohra bad ha ka jingwan jong kitei ki lai ngut, la pynlong ïa ka sakramen jong ka jingkhawai U Trai, kaba nyngkong eh ha ka 8tarik Kyllalyngkot 1843. Ha kane ka sakramen ki don tang 5ngut kiba ïashim bynta bad kita ki long u Rev. Thomas Jones bad ka lok jong u lem bad kitei ki lai ngut kiba dang shu wan poi thymmai. Nangta u la ïathuh ruh ba katkum ka shithi U Rev. Thomas Jones, la lah ruh ban tei pyndep ïa ka ïingmane ba nyngkong eh ha ka 1tarik Jymmang 1844, ha ka jinglut kaba long 170 tyngka. Khatduh eh u Prof. S. S. Majaw, u ong; “Ka jingpynmih ïa kiwei pat ki jait kyntien thoh ha kine ki sngi, ka long ka jingma ïa ka jaitbynriew bad lada ngi leh ïa kane ka kam, ngi la sahnarphna ïa Rev. Thomas Jones”.

Ha ka jingbuh syntiew ha u mot sah kynmaw u Rev. Thomas Jones uba don ha phyllaw ka Synod College, la buh da U Dr. D. R. L. Nonglait, KAS, u Rev P. Hynniewta, KJP Assembly bad Prof. C. Pariat, Synod College. Kum ban shu pynkynmaw ïa une u mot sah kynmaw uba don ha phyllaw ka Synod College la tei da ka Khasi Authors’ Society ha ka snem 2010. La pynshngaiñ ruh ha kane ka sngi, da ka jingrwai kaba shoh jingmut, na ki samla pule ka Synod College, kaba kyrteng “Im ka kyrteng sah ka nam”. Bad ka jingkren ai khublei na I Prof. C. Pariat, Vice Principal Synod College.

Ha kane ka sngi, la ïoh ruh ban pyllait paidbah ïa ka kot u Kolanjunes Diengdoh, kaba la ai kyrteng; “Ka matti u Frank M. Pugh” da u President ka KAS. Kiba ïadon lang ha kane ka jingleit buh syntiew ki long ki dkhot ka Khasi Authors’ Society, ki nonghikai bad samla pule ka Synod College, ki nongthoh khubor bad kiwei kiwei ki riew rangbah.