Ka Khasi Authors’ Society hapoh ka jingpynïaid ka Shnat Mawkyrwat, KAS ryngkat ka jingïatreilang bad ka Khasi Department, Sngap Syiem College ka la pynlong ïa ka jingrakhe ïa ka sngi u Thomas Jones ryngkat ka lympung ïamir-jingtip halor ka phang ‘Im ka Ktien Im ka Jaitbynriew’. Ïa kane ka program la pynlong ha u bnai Jylliew 22 tarik, 2022 ha Sngap Syiem College, Mawkyrwat.
Ha kane ka lympung la wan sakhi bad ïashim bynta da ki Dkhot ka KAS, Nonghikai jong ka Sngap Syiem College, nonghikai bad khynnah pule jong ki khyndai (5) tylli ki College bad Higher Secondary School jong ka South West Khasi Hills District, ki nongïalam Niam, ki nongïalam shnong jong ka thaiñ, ki nongïalam Seng Bhalang kum ka KSU, FKJGP, HYC bad kiwei kiwei jong ka South West Khasi Hills District; ryngkat ki nongpathai khubor.
Ha kane ka jingrakhe U Rangbah Renikton Tongkhar, MLA Mawkyrwat Constituency u la wan ban kyrkhu kyrdoh kum u Kongsan. U kongsan u la kren halor ka jingnoh synñiang u Thomas Jones bad ka jingroi ka ktien Khasi, nangta u la ai ruh ka jingkyrkhu kyrdon ïa ka KAS ha ka jingïaleh jong ka ban daw na ka Sorkar India ban pynrung noh ïa ka ktien Khasi ha ka khyrnit baphra. Ha kane ka jingïalang la ïoh ruh ka jingkren maitphang da u Vice President ka Seng, Dr. K.D. Ramsiej. Nalor ki jingkren la ïoh ruh ka jingrwai kyrpang na ka kynhun Ïong Lajong Cultural Club.
Ha ka sienshong kaba II la bteng da ka jingkren na ki riewshemphang; u Rev. (Dr.) G.P.L. Gadew uba la ai jingkren halor ka phang ‘U Synñiang u Thomas Jones sha ka Jaitbynriew Khasi’ bad u Fr. (Dr.) Ioannis War Pakma uba la ai jingkren halor ka phang ‘Ka thoh ka tar Khasi ka Ïtkhmih ka Jaitbynriew’. Hadien ka jingkren la ïoh ïa ka jingïapylliew jingmut bad ka jingai jingmut halor ka phang ba ki la buh. Ha kaba la ïashim bynta shitrhem da baroh ki nongïashim bynta. Ïa ki jingïalang baroh ar tylli la pynïaid da u Bah S.S. Lyngkhoi, President, KAS Shnat Mawkyrwat bad Bah S.C. Syiemlieh, Vice President, KAS Shnat Mawkyrwat. La pynwai ïa ka jingïalang da kaba buh jingdwai kyrpang bad kyrkhu kyrdoh da u Rev. (Dr). S. I. Iawphñiaw.
