Ka Khasi Authors’ Society ha ka 18 tarik Nohprah, 2024 ka la pynlong ïa ka Lyngkhuh Sngi ïap ba 84 u Myllung Soso Tham ha Ri Bhoi College, Nongpoh. Ha kane ka jingrakhe la pynlong ruh ïa ka Lympung Ïamir-jingtip halor ka phang “Ka Mynnor, ka Mynta bad ka Lashai ha ki Poitri Khasi”. Ïa kane ka jingrakhe la pynïaid da ka Khasi Authors’ Society, Shnat Nongpoh ha kaba la ïatreilang bad ka Khasi Department, Ri Bhoi College, Nongpoh. Ha kane ka sngi ki nongshim bynta ki long ki dkhot ka Khasi Authors’ Society, ki nongwad bniah, ki nonghikai bad samla pule jong ka department Khasi na Ri Bhoi College, Balawan College, Northern Ri Bhoi College, Eastern Ri Bhoi College, University of Science and Technology, Meghalaya, bad ki dkhot ka Governing Body Ri Bhoi College, Nongpoh. La kyrkhu kyrdoh ïa ka Lympung Ïamir-jingtip da u Rangbah Mayralborn Syiem, MLA, Nongpoh constituency kum u kongsan.

Ïa ka jingïalang plie la pynïaid da u rangbah Cosmas Rynshon, President KAS, shnat Nongpoh. La dang ïa ka jingïalang da ka jingkren pdiang sngewbha na ka kong Wandashisha Nongkynrih, khliehduh jong ka Department Khasi, Ri Bhoi College, Nongpoh, bad la pynbud ruh da ka jingrwai kyrpang na ki samla pule Khasi Traditional Music, Ri Bhoi College, Nongpoh. Ïa ka jingkren maitphang la kren da u rangbah Phrikshon Kharshiing, Finance Secretary, Khasi Authors’ Society.

Ïa ka Lympung-ïamir-jingtip la pynlong ha ki artylli ki sienshong. Ïa ka sienshong ba nyngkong la pynïaid da u Dr. M. M. Khymdeit, Vice President, KAS, shnat Nongpoh. Ki Riewshemphang kiba la ai jingkren ha kane ka Lympung ki long; (1) Dr. Kampher Phawa uba la ai jingkren halor ka phang bynrap, “Ka jingsynshar nongwei bad ka jingktah jong ka ïa ka jaitbynriew Khasi”, (2) Dr. Walter Thabah u la ai jingkren halor “ka Ri Uzbekistan bad ka shnong Mawphu ha ka poim ‘Ka Biria U Bieit” bad (3) Bobby More Kharbani u la ai jingkren halor “Ka sengpyrkhat halor ka mariang kumba ka paw ha ki poim u Paul Lyngdoh”

Ïa ka sienshong baar la pynïaid da u Dr. R. P. Kharshiing, General Secretary, Khasi Authors’ Society. U riewshemphang, Prof. D. R. L. Nonglait u la ai jingkren halor ka  “Ka Mynnor, ka Mynta bad ka Lashai ha ki poim u D. S. Khongdup”, ka kong Frugiferous Diengdoh ka la ai jingkren halor “ka kylla-ktien ha ki poitri u Soso Tham” bad u bah Esmarjune Kharpan u la ai jingkren halor ka phang “Ka jingktah ka synshar nongwei: Ka jingïohi ki myllung”

Baroh ki jingkren da ki riewshemphang ha baroh artylli ki sienshong ki long kiba myntoi, kiba don jingmut bad kiba ai jingshai. Ha kane ka Lympung la ïashim bynta ruh da ki nongïashim bynta ha kaba ki la buh jingkylli jingshai hakhmat ki riewshemphang bad ki jingai jingmut ban kyntiew ïa ka thoh ka pule khasi lynba ki poitri. La pynkut ïa ka Lympung-ïamir-jingtip da kaba sam ïa ki syrnot bad memento sha ki shongknor bad ki riewshemphang bad ka jingkren ai khublei na u bah Esmarjune Kharpan, Secretary, KAS, shnat Nongpoh.

Ka Seng ki Nongthoh Kot Khasi (Khasi Authors’ Society) ha ka 21 tarik Naiwieng, 2024 ka la pynlong ïa ka Lympung ki Nongthoh (Writers Conclave) halor ka phang; “Ka Thir bniah їa ka jinglong kyrpang u Khasi ha ka kolshor” (Exploring the cultural identity of the Khasis). Ïa kane ka Lympung la pynlong ha ha Arts and Culture Hall, Shillong. Kane ka Lympung ka long shi bynta jong ka jingrakhe ïa ka sngi kyrpang ki riewlum ba la tip kum ka Janjatiya Gaurav Diwas 2024 ha shi tyllup ka ri India.

Ïa kane ka Lympung la phiah ha ki ar tylli ki sienshong ha kaba u Bah Frederick Roy Kharkongor, Principal Secretary jong ka Tnat Arts & Culture, Govt. of Meghalaya u la wan ban kyrkhu kyrdoh kum u Kongsan bad u Prof. D.R.L. Nonglait, President KAS u la ai ka jingkren Maitphang. Ha kane ka sngi, la wan ban  ïashim bynta da ki Nongthoh, Research Scholars, ki Nonghikai bad ki samla pule Post Graduate na ka tnat Khasi NEHU, Shillong College, Sankardev College bad Jaintia Eastern College bad kiwei kiwei.

Ha ki ar tylli ki sienshong la ïoh ka jingbatai bniah ïa ki phang bapher bapher halor ka jinglong kyrpang u Khasi da ki ‘riewshemphang. Kaba kynthup ïa u Professor Desmond L. Mawphlang, Department of Folkloristics, NEHU, Dr. Walter Thabah, Associate Professor Sankardev College, Dr. Barika Khyriem, Assistant Professor NEHU, Dr. Airpeace Rani, Assistant Professor Synod College, Dr. Banniewkor L. Nongbri, Nonghiaki Music ha Ri Bhoi College, bad Bah Raphael Warjri, u nongdro dur bapaw ka jylla. Baroh ki jingkren ki long kiba sngewtynnad bad kiba ai jingtip shibun halor ka jinglong kyrpang u Khasi ha ka Kolshor. La ïoh ruh ka jingïaphylliew jingmut da baroh ki nongïashim bynta bad la pynwai da ka jingkren ai khublei na u Co-ordinator Bah Esmarjune Kharpan.