Kum shi byntaban pynphriang ïa ka jingtip kylleng ka Ri Lum Khasi bad Jaiñtia halor ka jingmyntoi ka Ktien Khasi lada ka rung ha ka khyrnit baphra bad ka jingdonkam ban pynneh pynsah ïa ka ktien nongmei nongpa. Ka Khasi Authors’ Society ka la sdang ïa ka jingpynshai paidbah halor ka phang; “Haba im ka ktien, im ka jaitbynriew”. Ïa kane ka jingpynshai paidbah ka KAS ka la dep ban pynlong ha ki lai tylli ki jaka; (1) Ha ka 27.9.2024 ka KAS Shnat Sohra ka la pynlong ha Sohra Government College, Sohra ha kaba la ai jingpynshai da u Dr. R. P. Kharshiing, General Secretary KAS bad Bah Esmarjune Kharpan, (ii) Ha ka 6.12.2024 ka KAS Shnat Sohra ka la pynlong ha Cherra Presbyterian Higher Secondary School, Sohra ha kaba la pynshai da u Bah Wanstep Diengdoh, Vice President ka Shnat Sohra KAS bad (iii) Ha ka 20.2.2025, ka KAS ha ryngkat ka jingïatreilang bad ka Khasi Department St. Edmund’s College, Shillong ka la pynlong ha St. Edmunds’ College ha kaba u Dr. R.P. Kharshiing, General Secretary KAS u la ai ka jingpynshai. Kine ki prokram ki long kiba jop ha kaba kiba bun ki samla pule ki la ïoh shibun ka jingmyntoi.

Kumban shu pynkynmaw ka KAS ha ka Dorbar kaba la long ha ka 25.5.2024 da kawei ka jingmut ka la rai ban nang pynkhlaiñ shuh shuh ha ka jingdawa ban pynrung ïa ka Ktien Khasi ha ka Khyrnit baphra jong ka Riti Synshar ka Ri India bad ban pynrung ruh ha ki dkhot ka jaitbynriew ban ieit ïa la ka jong ka ktien nongmei nongpa. Kawei na ki jingïakut ka long ban leit pynshai bad pynsngew paitbah ha kylleng ki jaka ha Ri Khasi kum ha ki jaka pule, ki shnong, ki jaka paitbah bad kiwei kiwei ki jaka, da kaba ïa sngewthuh jingmut bad kino kino ki bor pynïaid kiba lah ban ïa treilang. Halor kane ka KAS ka wer ïa kino kino ki Shlem ai jinghikai, ki Seng bapher bapher, ki bor shnong lane kino kino ki bor pynïaid ba kin sngewbha ba wan sha khmat ban ïatreilang bad ka Seng ha kaba pynlong ïa kum kine ki jingpynshai paidbah. Khnang ban lah ban pynphring stet ïa ka jingthmu halor ka jingdonkam ban pynneh pynsah ïa ka ktien Khasi bad ka jingmyntoi na ka bynta ka lawei ka ban sa wan.

Kum shi bynta ban kynmaw ïa ka jingdap 150 snem ka Shillong kum ka nongbah (1874 – 2024), kata ha ka snem 1874 ha kaba la jied ïa ka Shillong kum ka jaka pdeng ban treikam hadien ka jingpynlong ïa ka Assam ka Chief Commissioner’s Province. Ka Khasi Authors’ Society ka la pynlong ïa ka Lympung Ïamir-jingtip halor ka phang “Ka Shillong: ka Mynnor, ka Mynta bad ka Lashai”ha Sankardev College, Shillong ha ka 11.9.2024. Kane ka sngi ka dei ruh ka lyngkhuh dap snem ba 45 jong ka KAS, ïa kaba la tip ïa kane ka sngi kum ka Sngi ka Thoh ka Pule (Literary Day).

Ha kane ka sngi, u Dr. Ricky A.J. Syngkon, MP Lok Sabha u la wan ban kyrkhu kyrdon ryngkat ki kyntien ai mynsiem kum u Kongsan. Nalor ka jingkren u Kongsan u la ïoh ruh ban sam ïa ka Khusnam Khasi Authors’ Society sha ki 11 ngut ki samla pule kiba ïoh heh duh ki mark ha ka sobjek Khasi ha ka eksamin bapher bapher. Ha kane ka jingïalang, u kongsan u la pyllait paidbah ruh ïa ki 3tylli ki kot; (1) “Ka Antigone” ba la thoh da u Bah Hamles Mylliem Umlong, (2) Ka kheiñkut Kheiñkha u Khasi ba la thoh da u Bah Raphael Warjri, (3) “The Megalithic Culture of Khasi Jaintia Hills” ba la thoh da u Dr. Marco Babit Mitri. Ïa kane ka jingïalang la pynïaid da u Babu Pynwandur Shabong bad la kren maitphang ïa ka jinrakhe da u Prof. D.R.L. Nonglait, President KAS. Ha ka sienshong kaba ar bad ba lai la pynïaid da u Dr. K. D. Ramsiej bad Dr. M.M. Khymdeit. Ki riewshemphang kiba la ai jingkren ha ki ar tylli ki sienshong katkum ki phang ba la shaniah ha ki ki long;

1. Prof. Desmond L. Kharmawphlang – Ka Bynta jong ka Shnong Laitumkhrah ha ka Saiñ Dur ïa ka Kolshor ka Sor Shillong.
2. Bah Kitbor W. Nongrum – Ka Ïewduh ha Sor Shillong.
3. Bah Phrikshon Kharshiing – Ka Sor Shillong kum ka Nongbah.
4. Prof. Kynphamsing Nongkynrih – Ka Shillong Lyngba ka Mynsiem jong ka Miet.
5. Bah Wansoon Kharkrang – Ka Cinema ha Sor Shillong ha ki por Mynnor.
6. Bah W. Norbert S. Jana Nongbet – Ka Jingsdang, ka Jingroi bad ka Jingkylla ka Sor

Shillong.

Ka jingkren na ki riewshemphang ka la pynrhem shisha ïa baroh ka ïing ha kaba la pynkynmaw ïa ka mynnor ka mynta bad ka jingïohi ïa ka lawei jong ka sor Shillong. Ha kane ka jingïalang la pynbud da ka ka jingïaphylliew jingmut hapdeng ki nongïashim bynta baroh. Ha kane ka Lympung la pynsngewtynnat shuh shuh da ka jingrwai na ki samla pule ka Sankardev College, Shillong. Ka jingïashim bynta da i Principal ka Sankardev College, ki nonghikai na Sankardev College, ki dkhot ka KAS, ki dkhot seng bhalang bapher bapher, ki nonghikai bad ki samla pule na ki college bapher bapher kiba don ha Shillong bad kiwei kiwei de ki riew rangbah. Ki Samla kiba la ïoh pdiang ïa ka Khusnam KAS 2024 ki long;

2024
sl.no	Exam	Subject	Name of Students	Name of School/College	% of Marks
1	SSLC	Khasi (IL)	Ribahunlang Lamarai	Raid Nongbri Presbyterian Secondary School, Umsaw Nongbri	97
2	ICSE (Class X)	Khasi (SL)	Ialammiki Lamare	Meghalaya Police Public School, Shillong	99
3	ICSE (Class X)	Khasi (SL)	Josiah Duncan Lyngdoh Mawphlang	Meghalaya Police Public School, Shillong	99
4	ICSE (Class X)	Khasi (SL)	Claudia Arella Khyriem	Meghalaya Police Public School, Shillong	99
5	ICSE (Class X)	Khasi (SL)	Abigail Ioanna Suchiang	Meghalaya Police Public School, Shillong	99
6	HSSLC (Arts)	Khasi (Elective)	Pynbha Lynshiang	Holy Cross Higher Secondary School, Mawkynrew	82
7	HSSLC (Arts)	Khasi (MIL)	Menangmankhraw Kharkongor	St. Anthony’s Higher Secondary School, Shillong	92
8	HSSLC (Commerce)	Khasi (MIL)	Ferry Filarisha Wann	St. Mary’s Higher Secondary School, Shillong	94
9	HSSLC (Science)	Khasi (MIL)	Ritilian Diengdoh	R. K. Mission Higher Secondary School, Sohra	94
10	HSSLC (Science)	Khasi (MIL)	Ar Meker Marpna	St. Anthony’s Higher Secondary School, Shillong	94
11	B.A.	Khasi (Hons)	Badaker Nongneng Daloi	Sankardev College, Shillong	77