Watla ka Sorkar Jylla ka la pdiang ïa ka Rai (Resolution), ka Khasi Authors’ Society kam shym la shong kli kti lane shaniah tylli tyllan ha ka Sorkar Jylla, hynrei ka la pyrshang hi katba lah ka bor ban thaw ki lad ki lynti ban pynbor ïa ka sorkar India. Ka jingpyrshang kaba nyngkong eh ka long ban pynkhreh ïa ka Dorkhas (Memorandum) ban phah sha u Myntri kam poh ïing ka Sorkar Pdeng. Ïa ka dorkhas kaba don 8 sla, la thoh sha u Shri. Rajnath Singh, Honourable Minister of Home Affairs, Government of India, New Delhi bad la phah kopi sha kiwei pat ki heh sorkar kiba don jingïasnoh bad kane ka kam.
Ïa ka dorkhas la ïoh ban leit ai markhmat ha Nongbah Delhi ha u Shri Kiren Rijiju, Minister of State for Home Affairs, Government of India, New Delhi ha ka 3.1.2019. Na ka liang u Rijiju u la batai ba haduh mynta ki don 38 tylli ki ktien kiba dawa bad ka ktien Khasi ka dei kawei na kita, kumta halor kane hap ruh ban peit bniah ha baroh ki liang la kata ka ktien ka la long ne em kaba pura ban pynbiang ïa ki jingdonkam baroh kum ha UPSC bad CIIL. Ha ka jingïakren u la kular ban phah ïa kane ka kam sha ki tnat ba dei peit khnang ba kin ïoh bishar bniah bad u la pynpaw ruh ba un shim khia ïa ka ktien Khasi namar ka dei kawei na ki ktien ba lah kham paw ha NE India.
Ha ka 5.1.2019, la ïoh ban kynduh ïa u Shri Rajnath Singh, Myntri kam poh ïïng ka Sorkar India ha ïing sah jong u. Ha kane ka jingïakynduh na ka liang u Myntri u la pynpaw ba u la dep buh jingmut ïa kane ka kam bad u la ïa kren ruh halor kane ka kam bad u Prime Minister, Shri Narendra Modi. Ki dkhot ka seng kiba la ïoh ban leit sha Delhi ki long u Prof. D. R. L. Nonglait, President KAS, Bah Ronald P. Kharshiing, General Secretary KAS, Prof. A. Kharmalki, bad Bah Danial Stone Lyngdoh Nonglait; bad la jingsynran lang da i Prof. Tiplut Nongbri na Delhi, Bah David Kharsati (Vice President, BJP Meghalaya) bad Bah A. L. Hek, Myntri ka Sorkar Jylla.
Na kane ka jingleit ai dorkhas bad jingïakren, ka ophis jong ka Ministry of Home Affairs, Government of India lyngba u Under Secretary ka la phah ïa ka shithi sha ka Seng ha ka 5.3. 2019, kaba batai ba ka Khasi ka dei kawei napdeng ki 38 tylli ki jait ktien kiba ka Ministry ka dang khmih bniah.
