Ka Khasi Authors’ Society hapoh ka jingïalam u President, Dr. D. R. L. Nonglait bad ki dkhot ba la kham rangbah jong ka seng ha ka 18.4.2018 ki la leit ban ïa kynduh ïa u Myntri Rangbah ka Jylla, u Conrad Sangma ha kamra treikam jong u. Ha ka jingïakynduh, ka seng ka la pynkynmaw ha ryngkat ki jingthoh ha u Myntri Rangbah, halor ka jingdawa ban pynrung noh ïa ka ktien Khasi ha ka Kyrnit kaba phra (Eight Schedule) jong ka Riti Synshar ka Ri India.

Ha ka jingïatai kaba bniah halor kane ka phang, na ka liang u Myntri Rangbah ka Jylla u la kular ban shim khia halor kane ka kam. U la ong; ba un sa ïakren bad ki ophisar ban tip haduh katno ka kam ka la ïaid haduh mynta bad ruh ban bthah ïa ki, ba kin pyntip noh shen ha shuwa ba u un leit sha Delhi ban kynduh ïa u Myntri Kam Poh ïing ka Ri halor kane ka kam. Nangta shuh shuh u Myntri Rangbah, u la kular ban kitkhia hi da lade ban ïatrei lang bad ki Myntri Rangbah jong ki Jylla ka thaiñ shatei lam-mihngi jong ka Ri India ban pynsngew lang ïa kane ka juh ka mat jingdawa sha ka sorkar pdeng. Haduh mynta ki don haduh 38 tylli ki jait ktien bapher bapher, kynthup lang ïa ka ktien Khasi na Meghalaya bad katto katne ha ki jylla kiba shatei lam-mihngi ka Ri; kum ka ktien Tenyidi na Nagaland, Mizo (lushai) na Mizoram, Kok Barak na Tripura, Lepcha na Sikkim bad kiwei kiba ïakhun ban ïoh pynrung lang ïa ka ktien jong ki ha ka Kyrnit kaba phra bad mynta ki dang don ha ka jingpeit bniah jong ka Ministry of Home Affairs.

Halor kane, ka Khasi Authors’ Society ka la pynsngew ruh ha u Myntri Rangbah ba un pyrshang katba lah ban pynstet ia kane ka kam la kumno kumno ha shuwa ka elekshon MP ka ban long ha u snem 2019. Kumta na ka liang ka seng ka kyrmen bad khmih lynti ba kaba bha kan mih na kane ka jingïakynduh. Ki dkhot ka seng kiba ïadon lang ha kane ka jingïakynduh ki long Dr. D.R.L. Nonglait (President), Bah Kitbor W. Nongrum (Vice President), Dr. K. D. Ramsiej, Babu Andreas Sun, Prof. Badaplin War, Prof. Esther Syiem, Prof. Streamlet Dkhar, Prof. Antoinette Kharmalki, bad Bah Ronald P. Kharshiing.

Kum ban shu pynkynmaw, ka KAS ka la dawa na ka por sha ka por na ki bor Sorkar khlem da shongthait naduh ka snem 1979, ban pynrung noh ïa ka ktien Khasi ha ka Kyrnit kaba phra (Eight Schedule) jong ka riti synshar ka Ri India. Kumta nangne sha khmat ka seng kan nang pynjur ïa kane ka jingdawa namar ba shisien ba ka ktien Khasi ka la ïoh ïa ka jingithuh da ka Riti Synshar ka Ri ym lah shuh mano mano ruh ban pyndam ïa ka Jaitbynriew. Kumta ka seng ka wer bad khot sngewbha ïa baroh ban ïasnoh kti lang naduh ki nongthoh kot, nonghikai, ki seng bapher bapher kynthup ki sengniam lane seng trei mon sngewbha bad ki paidbah baroh, khnang ban ur long kane ka jingdawa. Kane ka long ka kyrwoh na u Joint Secretary ka seng, Bah Ronald P. Kharshiing.

La pynhab ïa ka pyrda jingrakhe jingdap 175 snem ka thoh ka pule ha ka ktien Khasi ha ka 16.9.2017 ha Science Seminar Hall, NEHU Campus, Shillong. Ha katei ka sngi la pynlong ruh ïa ka Seminar halor ka phang “Haba Im ka Ktien ka Jaitbynriew ka Im”. La kyrkhu kyrdoh ïa katei ka sngi da u Bah Ronnie V.Lyngdoh, Minister Arts & Cuture uba long u Kongsan jong katei ka sngi bad u Bah Ardent Miller Basaiawmoit, MLA kum u Symbud Kongsan. La pynrhem bad pynshongshit ïa katei ka jingrakhe da ka jingrwai ka Seng Khasi College, Shillong bad ka phawar na ki samla pule ka Nongstoin College. La ïoh ruh ban sam ïa ka Prize sha ki nongjop ha ki jingpynisab pule Jingïathuhkhana bad pule Poetry. Kum ka dak ka jingsahkynmaw ïa ka jingrakhe ka jingdap 175 ka thoh ka pule ha ka ktien Khasi, ka Seng ka la pynmih ïa ka Thup Sahkynmaw bad pyllait paidbah da u Bah Ronnie V.Lyngdoh, Kongsan. La pynkut noh ïa ka jingrakhe da ki kyntien kyrkhu kyrdoh u Kongsan.

Ha ka sngi pynhab ïa ka pyrda jingrakhe jingdap 175 snem ka thoh ka pule ha ka ktien Khasi, ka Seng ka la sam ruh ïa ka Khusnam sha ki 8 ngut ki Samla Pule Secondary School, ICSE bad Higher Secondary kiba ïohheh duh ki mark ha ka subject Khasi. Ïa kane ka Khusnam la tip da ka Khusnam Khasi Authors’ Society, 2017. Ki samla kiba la ïoh ïa kane ka khusnam ki kynthup ïa kine –
1. Alvaliza Nongrum(HSSLC.Sc.MIL-94mark)
2. Margrave Marboh (HSSLC.Com.MIL-88mark)
3. Baphindalin Mawiong (HSSLC.Com.MIL-88mark)
4. Pyndapbiang Lyngdoh (HSSLC.Arts.MIL-94mark)
5.Aidahunlang Kharkamni (HSSLC.Arts.Elective-86mark)
6. Grazelle Laetirtia Bamon (ICSE.SL-98mark)
7. Daphikynti War (ICSE.SL – 98mark)
8. Dakermedo Nongpluh (SSLC.MIL-98mark)

Ha kane ka sngi la pynlong ruh ia ka Seminar halor ka phang, “HabaIm Ka Ktien Ka Jaitbynriew Ka Im” bad ki riewshemphang kiba la ai jingkren i long kumne harum :

1. Ka jingnoh Synñiang ki Balang sha ka Literashor Khasi – Rev. Dr. B. L. Nongbri
2. Ki Balang ki pynriew spah ïa la ka Ktien Khasi – Rev. Fr. Dr. Barness Mawrie
3. U Synñiang ka Seng Khasi sha ka Literashor Khasi – Babu Kular Khongjirem.
4. Ka ktien Khasi ha ki skul Pule – Prof. (kong) A.Kharmalki.