Ka Khasi Authors’ Society hapoh ka jingpynïaid ka Shnat Nongstoiñ, KAS ryngkat ka jingïatreilang bad ka Khasi Department, Nongstoin College ka la pynlong ïa ka jingrakhe ïa ka sngi u Thomas Jones ryngkat ka lympung ïamir-jingtip halor ka phang ‘U Thomas Jones bad u synñiang jong u sha ka imlang sahlang U Khasi’. Ïa kane ka program la pynlong ha u bnai Jylliew 22 tarik, 2022 ha Nongstoin College, Nongstoiñ.

            Ha kane ka programme la wan sakhi bad ïashim bynta da ki Dkhot ka KAS, Nonghikai jong ka Nongstoin College, nonghikai bad khynnah pule jong ki khyndai (9) tylli ki College bad Higher Secondary School jong ka West Khasi Hills District, ki nongïalam Niam, ki nongïalam shnong jong ka thaiñ, ki nongïalam Seng Bhalang kum ka KSU, FKJGP, WKSU, bad HYC jong ka West Khasi Hills District, bad ki nongpathai khubor.

Ha kane ka jingrakhe U Rangbah Macmillan Byrsat, MLA Nongstoin Constituency u la wan ban kyrkhu kyrdoh kum u Kongsan bad u Rev. Fr. Anselm Nonglang kum u Symbud Kongsan. Ki riewshemphang ki long u Dr. K. P. Phawa uba la kren halor ka phang “U Thomas Jones bad u synniang jong u sha ka imlang sahlang U Khasi” bad u Rev. A. I. Kharshiing uba la kren halor ka phang ‘U Rev. Thomas Jones, ka ïoh ka kot bad ka khuid ka suba’.Nalor ki jingkren la ïoh ruh ka jingrwai kyrpang na ki samla pule ka Nongstoiñ College, Nongstoiñ.

Ka Seng ki Nongthoh Khasi (Khasi Authors’ Society) ka la pynlong ïa ka Dorbar Pyllun ha ka 3.5.2022 ha Synod College, Shillong. Kane ka Dorbar ka long hadien 4 snem ba khlem ïoh shuh ban pynlong na ka daw ka jingpang khlam Covid-19. Ha kane ka sngi u President ka Seng, Dr. D. R. L. Nonglait ryngkat u Vice President, Dr. K. D. Ramsiej ki la pdiang sngewbha ïa ki 75 ngut ki Nongthoh Khasi kiba la pynïasoh ïa lade kum ki Dkhot ba pura jong ka KAS.

Ha ka jingkren pdiang ïa ki dkhot ba thymmai u Dr. D. R. L. Nonglait, u la ong ba watla ha ki 4 snem ba la dep ka seng ka la duh noh ïa ki 9 ngut ki dkhot ba kham rangbah jong ka seng, hynrei ka jingpynïasoh thymmai ki 75 ngut kiwei pat ki dkhot kan ïarap ban pyntyllun stet ïa ki mat treikam ka seng. Kum ka dak ka jingburom ïa kine ki dkhot ba la khlad noh la pynlong ka jingsngap jar 2 minit. Ha ka Dorbar, ka Seng ka la ïoh ruh ban pynkup burom ïa ka Prof. Badaplin War, Treasurer KAS kaba la ïoh pdiang ïa ka Padma Shri Award 2022 na ka President ka Ri India halor u synñiang ba ka la pynnoh na ka bynta ka Literature bad Education. Ka Seng baroh kawei ka pynpaw ka jingsngewkmen bad sngew sarong ïa kane ka longkmie kaba la wanrah ïa kane ka nam ka burom bad la ai ruh ka jingkyrkhu kyrdoh ba kan nang lah ban pynnoh shuh shuh ïa u synñiang sha ka seng bad ka jaitbynriew. Ha kane ka Dorbar la ïoh ruh ban ai syrnot nam sha u Dr. Ronald P. Kharshiing, General Secretary KAS uba la pyndep ïa ka jingpule Ph. D ha ka snem 2021. 

Ha kane ka dorbar, ka KAS ka la rai ban nang ïai pynkhlaiñ shuh shuh na ka bynta ban ïaleh ban pynrung ïa ka Ktien Khasi ha ka Khyrnit kaba phra (Eight Schedule) ka Riti Synshar ka Ri India. Nangta la rai ruh ban nang pynïar ïa ka rukom treikam ka Seng da kaba pynlong ïa ka Lympung ïamir-jingtip bad ka Demonstration ha New Delhi ha u snem 2023, ban pynmih ïa ka Khasi-Khasi Dictionary bad Documentation halor ka ktien, ka literashor bad kolshor Khasi. La pdiang ruh ïa ka jingpynbha ïa ka Riti Pynïaid Kam bad ki Kyndon Treikam jong ka Seng.

Ha kane ka sngi la ïoh ruh ban pynthymmai ïa ki nongkitkam bad ki dkhot CEC na ka bynta ka samoi treikam jong ka snem 2022 – 2025 kumne:

Auditors: (1) Dr. Davidson Diengdoh  bad (2) Bah Banlamkupar Lyngdoh

Ha kane ka Dorbar, ka KAS ka ai khublei ruh ïa baroh ki paidbah nongshong shnong ka Bri u Hynñiewtrep bad ki Seng bapher bapher kiba la kyrshan ïa ka seng ha ki por baroh. Khamtam eh ha ka jingïaleh ban pynrung ïa ka ktien Khasi ha ka Khyrnit ka baphra jong ka Riti Synshar ka Ri India. Mynta ka seng ka wer bad khot biang ïa ka jingïasnoh kti lang jong baroh ki nongthoh kot, ki nongthoh kotkhubor, ki nonghikai, ki seng saiñ pyrthei, ki seng niam, ki seng treimon sngewbha bad ki paidbah baroh, khnang ban pynurlong ia kane ka jingdawa. Shisien ba ka ktien ka la ïoh ïa ka jingithuh bad jingïada da ka Riti Synshar ka Ri, yn ym lah shuh mano mano ruh ban pyndam ïa ka jinglong kyrpang ka Jaitbynriew.