Ha ka 18 tarik Nohprah, 2025 ka KAS Shnat Mairag ka la rakhe ïa ka Lyngkhuh Sngi Ïap ba 85 u Myllung Soso Tham ha Tirot Sing Memorial College, Mairang da kaba ïatrei lang bad ka Khasi Department, Tirot Sing Memorial College, Mairang. Kiba wan ïashimbynta ki kynthup ïa ki dkhot KAS, ki nonghikai, bad ki samla pule na ki kolej bad ki Hr. Sec. School hapoh ka Eastern West Khasi Hills District. U kongsan ha kane ka sngi u long u Paiem P. Syiemlieh, Syiem ka Hima Nongkhlaw. Ki riewshemphang ki kynthup їa u Prof. D.R.L. Nonglait bad u babu Banlamkupar Lyngdoh kiba la kren halor u synñiang u myllung Soso Tham.

Ha ka sienshong baar la їoh ban pynlong їa ka jingїakop pule poitri, ha kaba la wan їashim bynta kumba 20 ngut ki samla pule na ki kolej bad Hr. Sec. School. Ki nongbishar ha kane ka jingïakop ki long ka Prof. S. Dkhar, Dr. R.S. Wankhar bad Babu Deibormi Nongpoh. Ki nongjop ha ka jingїakop pule poitri ki long kumne;

Na ka bynta ki kolej (degree category):

(1) Wanpyndapbor Pariong na Tirot Sing Memorial College, Mairang

(2) Khamti Mawlong na Khadsaw Phra College, Mairang

(3) Youniki Marweiñ na Mairang Presbyterian College, Mairang.

Na ka liang ki Higher Secondary School:

(1) Angel Jollyza Marbaniang na St. Thomas Hr. Sec. School, Mairang

(2) Daiariti Nongsiej na Mairang Presbyterian Hr. Sec. School, Mairang

(3) Celerity Thabah na Mairang Presbyterian Hr. Sec. School, Mairang.

Ka Khasi Authors’ Society ka la bteng ïa ka jingpynshai paidbah halor ka phang; “Haba im ka ktien, im ka jaitbynriew”. Kane ka long shi byntaban pynphriang ïa ka jingtip kylleng ka Ri Lum Khasi bad Jaiñtia halor ka jingmyntoi ka Ktien Khasi lada ka rung ha ka khyrnit baphra, ban dawa pynlong ktien Sorkar (official language) ïa ka ktien Khasi ha ka Jylla bad ka jingdonkam ban pynneh pynsah ïa ka ktien nongmei nongpa.

Ïa kane ka jingpynshai paidbah ka KAS ka la dep ban pynlong ha ki bun tylli ki jaka; (1) Ha ka 26.10.2025 ka KAS Shnat Mairang ha ryngkat ka jingïatreilang ka Khasi Department, Tirot Sing Memorial College ka la pynlong ha Tirot Sing Memorial College, Mairang ha kaba la ai jingpynshai da u Prof. D.R.L. Nonglait, President KAS bad u Dr. R. P. Kharshiing, General Secretary KAS, (2) Ha ka 3.11.2025 ka KAS ka KAS ha ryngkat ka jingïatreilang bad ka Khasi Department Shillong Commerce College, Shillong ka la pynlong ha Shillong Commerce College ha kaba u Dr. R.P. Kharshiing, General Secretary KAS bad u Babu Pynjopthiaw Nongrum ki la ai jingpynshai. Bad (3) Ka KAS Shnat Sohra ka la pynlong ha kiba bun tylli ki jaka ha kaba la pynshai da ki Nongïalam ka Shnat Sohra. Kine ki prokram ki long kiba jop ha kaba kiba bun ki samla pule ki la ïoh shibun ka jingmyntoi.

Kumban shu pynkynmaw ka KAS ha ka Dorbar kaba la long ha ka 07.06.2025 da kawei ka jingmut ka la rai ban nang bteng ha ka ban pynkhlaiñ shuh shuh ha ka jingdawa ban pynrung ïa ka Ktien Khasi ha ka Khyrnit baphra jong ka Riti Synshar ka Ri India bad ban pynrung ruh ha ki dkhot ka jaitbynriew ban ieit ïa la ka jong ka ktien nongmei nongpa. Kawei na ki jingïakut ka long ban leit pynshai bad pynsngew paitbah ha kylleng ki jaka ha Ri Khasi kum ha ki jaka pule, ki shnong, ki jaka paitbah bad kiwei kiwei ki jaka, da kaba ïa sngewthuh jingmut bad kino kino ki bor pynïaid kiba lah ban ïa treilang. Halor kane ka KAS ka wer ïa kino kino ki Shlem ai jinghikai, ki Seng bapher bapher, ki bor shnong lane kino kino ki bor pynïaid ba kin sngewbha ba wan sha khmat ban ïatreilang bad ka Seng ha kaba pynlong ïa kum kine ki jingpynshai paidbah. Khnang ban lah ban pynphring stet ïa ka jingthmu halor ka jingdonkam ban pynneh pynsah ïa ka ktien Khasi bad ka jingmyntoi na ka bynta ka lawei ka ban sa wan.