Kum shi bynta ban pynkhlaiñ ïa ka riti ka dustur jong ka Jaitbynriew Khasi. Ka Khasi Authors’ Society ka la pynlong ïa ka Lympung Ïamir-jingtip halor ka phang “Ka tipkur tipkha ha u Khasi” ha Lady Keane College, Shillong ha ka 11.9.2023. Kane ka sngi ka dei ruh ka lyngkhuh dap snem ba 44 jong ka KAS, ïa kaba la tip ïa kane ka sngi kum ka Sngi ka Thoh ka Pule (Literary Day).

Ha kane ka sngi, u Bah Pynïaidsing Syiem, CEM, KHADC u la wan ban kyrkhu kyrdoh ryngkat ki kyntien ai mynsiem kum u Kongsan. Nalor ka jingkren, u Kongsan u la ïoh ruh ban sam ïa ka Khusnam Khasi Authors’ Society sha ki 12 ngut ki samla pule kiba ïoh heh duh ki mark ha ka sobjek Khasi ha ka eksamin bapher bapher. Ha kane ka jingïalang, u Prof. D.R.L. Nonglait, President, KAS u la pyllait paidbah ruh ïa ki 3tylli ki kot ba la thoh da u Kynpham Sing Nongkynrih kita ki long; 1) Ka Jingshai ha ka miet (poitri) 2) Ka jingngiew ka mynsiem briew (sawangka) bad 3) Ki miet ka jingtriem (Sawangka). Ïa kane ka jingïalang la pynïaid da u Bah Esmarjune Kharpan bad ha ka sienshong kaba ar la pynïaid da u Bah Witting Mawsor. Ki riewshemphang kiba la ai jingkren ha kane ka sngi ki long; (1) Dr. (Sr) Philomena Kharakor – Halor ka Tangjait u Khasi bad (2) Prof. Kynphamsing Nongkynrih – Ka Tip-kur Tip-kha ha ka pyrkhat Khasi.

Ha kane ka Lympung la pynrhem ruh ïa ka jingïalang da ka jingrwai na ki samla pule ka Lady Keane College, Shillong. Ka jingïashim bynta da u Principal ka Lady Keane College, Dr. Drankhlur Mukhim, ki nonghikai na Lady Keane College, ki dkhot ka KAS, ki dkhot seng bhalang bapher bapher, ki nonghikai bad ki samla pule na ki college bapher bapher kiba don ha Shillong bad kiwei kiwei de ki riew rangbah. Ki Samla kiba la ïoh pdiang ïa ka Khusnam KAS 2023 ki long;

sl.no	Exam	Subject	Name of Students	Name of School/College	% of Mark
1	SSLC	Khasi (IL)	Nangdapkor Shyllit	Phudmuri Presbyterian Sec. School, Shillong	97
2	ICSE (Class X)	Khasi (IL)	Adella Iarisa Khongwang	Loreto Convent, Shillong	99
3	ICSE (Class X)	Khasi (IL)	Daniella Shirley Majaw	Loreto Convent, Shillong	99
4	ICSE (Class X)	Khasi (IL)	Faith Bashisha Nongkynrih	Loreto Convent, Shillong	99
5	HSSLC (Arts)	Khasi (Elective)	Risakordor Nonglang	Nora Evalyn H/S School, Shillong	83
6	HSSLC (Arts)	Khasi (Elective)	Banpynshngainlang Thangkhiew	Patharkhmah Govt. H/S School, Patharkhmah	83
7	HSSLC (Arts)	Khasi (MIL)	Banpynshngainlang Thangkhiew	Patharkhmah Govt. H/S School, Patharkhmah	98
8	HSSLC (Commerce)	Khasi (MIL)	Cheerfully Marboh	Mawryngkneng H/S School, Mawryngkneng	94
9	HSSLC (Science)	Khasi (MIL)	Vanessa Dolly Sohkhlet	R. K. Mission H/S School, Sohra	95
10	HSSLC (Science)	Khasi (MIL)	Naphibanroi Mukhim	St. Margaret’s H/S School, Shillong	95
11	B.A.	Khasi (Hons)	Mazel Christy Nongkynrih	St. Edmund’s College, Shillong	78
12	M.A.	Khasi (Hons)	Labianghun Kharmalki	NEHU, Shillong

Ka Seng ki Nongthoh Khasi (Khasi Authors’ Society) ha ka 22tarik Jylliew 2023, ka la rakhe ïa ka Sngi u Thomas Jones (Thomas Jones Day) ha Thomas Jones Synod College, Jowai. Ïa kane ka jingrakhe la pynïaid da ka Shnat Jowai, KAS ryngkat ka jingïatrei lang bad ka Thomas Jones Synod College, Jowai. Ha kane ka sngi la pynlong ruh ïa ka lympung ïamir-jingtip halor ka phang “U Synñiang u Thomas Jones sha ka jaitbynriew Khasi”. U Kongsan ha kane ka sngi, u long u Rev. K. Pariat, Senior Executive Secretary K.J.P Synod Mihngi, ha ka jingkren u la ong ba ka jingwan ïuhkjat u Thomas Jones ha Ri Khasi ka la plie lad plie lynti ïa ka jaitbynriew Khasi ban ïaryngkat kyrdan ha ka jingnang jingstad bad kiwei pat ki jaitbynriew ka pyrthei. Kumta ka donkam ïa ka jaitbynriew ban nang ïai pynkhlaiñ ha ka liang ka thoh ka pule, khnang ba ngin nang ïai kiew ha ka liang ka jingstad. Ha ka sienshong kaba bud la ïoh ka jingkren na ki riewshemphang katkum ka phang ba la buh kumne; Prof. D.R.L. Nonglait – ‘U Synñiang u Thomas Jones sha ka thoh ka tar’ bad Rev. H.C.T Sumer – ‘U Synñiang u Thomas Jones sha ka imlang sahlang’. La pynrhem ruh ïa ka jingrakhe da ka jingrwai na ki samla pule ka Thomas Jones Synod College, Shillong.

Ha kane ka jingrakhe la wan sakhi bad ïashim bynta da ki Dkhot ka KAS, Principal bad Dkhot Governing Body, Thomas Jones Synod College, ki Nonghikai College kiba don ha West Jaiñtia Hills, ki samla pule ba la khot sngewbha na ki shlem pule kiba don ha West Jaiñtia Hills District, ki nongïalam Niam, ki nongïalam shnong jong ka thaiñ, ki nongïalam Seng Bhalang bad ki nongpathai khubor.