Ka Khasi Authors’ Society ha ka Dorbar kaba la long ha ka 28.4.2018 ka la ïakut skhem ban nang pynkhlaiñ ïa ka jingdawa ban kyntu ïa ka sorkar Jylla ban wanrah noh da ka rai (resolution) halor ka ktien Khasi. Katlah katïai, ka Seng ka la pyrshang katba don ka lad baroh ban pynurlong ïa kane ka kam kaba la angnud la slem da ka jaitbynriew. Da ka jingïatrei lang, kane ka kam ka la urlong ha ka Dorbar Thawaiñ jong ka Sorkar Jylla ha ka 27.9.2018. Ha kaba la pdiang ïa ka Rai (resolution) ban kyrpad ïa ka Sorkar India ban ithuh noh ïa ka ktien Khasi & Garo ban pynrung ha ka Khyrnit baphra jong ka Riti Synshar ka Ri.

Halor ka rai (resolution) ka Executive Committee ha ka jingïakynduh kaba kyrkieh ha ka 27.9.20 ka la pynpaw ka jingsngewnguh ïa ka sorkar jylla bad ïa baroh 60 ngut ki MLA kiba la kyrshan bad pdiang ïa ka rai (resolution) hadien ka jingkhmih lynti kaba la slem bha. Hynrei haba khmih bniah halor ka rai, la don ar tylli ki dieng pyngkiang (hurdles) kiba lah ban long pynban ka jingjynthut ïa ka Ktien Khasi ba kan ïoh jingithuh; kita ki long (i) Ka Khasi bad Garo kam dei ka Medium of Instruction haduh Higher Secondary lane Higher Education bad (ii) Ka Jylla kam pat don ïa ka Sahitya Sabha. Ka Executive Committee ha kane ka Jingïalang ka la ïakut ban dawa na ka Sorkar Jylla ban khot da ka Dorbar Kyrpang (Special Session) ban pynkylla noh ïa kane ka Rai jong ka Dorbar Thawaiñ halor kine ki jingpynshai; (i) Ba ka Ktien Khasi bad Garo ki dei ki medium of instruction ha ki jaka pule. Khamtam ïa ka Ktien Khasi la hikai ïa ka naduh ka kyrdan Primary haduh kyrdan Ph.D bad (ii) Ban kyrpad ïa ka sorkar jylla ban ithuh noh ïa ka Khasi Authors’ Society kum ka Sahitya Sabha hapoh ka jylla namar ba ka kam jong ka Seng ka ïa syriem bad ka rukom trei kam kiwei ki sahitya sabha ha kiwei ki jylla, ha kaba ïa ki ruh la kyrshan pisa da ka Sorkar Jylla kumba long ïa ka Seng.

Halor kane ka Seng ka la buddien da kaba kynduh ïa u Lamphang ka Iing Dorbar Thawaiñ, Myntri Rangbah ka Jylla bad kiwei. Ha ka jingbud dien kaba khah khah, ha ryngkat ki jingpynbud da ki shithi; ka Sorkar Jylla ka la pdiang ïa kane ka jingdawa. Kumta ha ka 27.11.2018 ka Sorkar Jylla ka la pynlong ïa Dorbar Kyrpang ban pynbha biang ïa ka rai (resolution) bad baroh 60 ngut ki MLA ki la pdiang ïa ka Rai ba thymmai baroh ar tylli kumba la dawa da ka Seng. Kane ka long ka jingjop kaba khraw ïa ka jaitbynriew bad kan dei ruh u mawmer u ban pynsah jingkynmaw shi junom ha ka jingïaid lynti ka Seng ban kynjoh sha kane ka thong. 

La pynlong ïa kane jingïalang ha ka 22.9.2018 ha Shillong. La sdang da ka jingïalum paidbah ha Madan Iewrynghep ha kaba u Pa’iem Phrester Manik Syiem, Syiem ka Hima Nongkhlaw u la kyrkhu kyrdoh bad plie ïa ka jingïaïaid paidbah. Nangto la bteng ïa ka jingïaid shaduh Madan Malki ha kaba la pynlong ruh ïa ka jingïalang paidbah. La pynïaid ïa ka jingïalang da u Dr. K. D. Ramsiej, Vice President ka Seng bad ki riewshemphang kiba la ai jingkren ki long u Bah Samuel B. Jyrwa, Chairman ka NESO, Prof. Antoinette Kharmalki, Head Department jong ka Khasi NEHU, Dr. P. Nongtdu, Principal Jaiñtia Eastern College, Prof. S. Loniak Marbañiang u nonghikai ba la shongthait na NEHU, (L) Dr. Bajubon Kharlukhi, MP barim bad Prof. D. R. L. Nonglait, President ka Khasi Authors’ Society. Ki nongkren baroh ki la ai ka jingkren kaba shai bad don jingmut, kaba long ruh katkum ka matpdeng ba la buh, “Haba Im Ka Ktien, Im Ka Jaitbynriew’. Ha kane ka jingpynshai paidbah ha ryngkat ki jingthoh pyrta (placard/slogan), da ki phew hajar ki paidbah ki la wan ban ïa shim bynta shitrhem; kynthup naduh ki samla pule bad ki nonghikai na ki skul, kolej bad university, ki seng bhalang, ki seng saiñ pyrthei, ki seng niam, ki seng bapher bapher bad ki riew paidbah.

Ki artylli ki mat ba la ban bha da ka Khasi Authors’ Society ka long ba ka Parliament ka dei ban pdiang noh mardor ïa ka Ktien Khasi ban pynrung ha ka khyrnit baphra ha ka sien shong Dorbar mynta u snem bad ka Dorbar Thaw Aiñ jong ka Jylla Meghalaya ka dei ban pdiang noh ïa ka rai (resolution) ha ka Dorbar halor ka jingdawa ban pynrung noh ïa ka ktien Khasi ha ka khyrnit baphra jong ka Riti Synshar ka ri India.