Ha Shillong rakhe ka KAS ïa ka Lyngkhuh Dap Snem ba 46

Ha ka 11tarik Nailur, 2025 ka Seng ki Nongthoh Kot Khasi (KAS) ka la rakhe ïa ka Lyngkhuh Dap Snem ba Sawphew Hynriew (1979-2025) ha Shillong Commerce College, Shillong, ha kaba ïa kane ka sngi la tip ruh da ka Sngi ka Thoh ka Pule (Literary Day). Ha kane ka jingrakhe la pynlong ruh ïa ka Lympung Ïamir-jingtip halor ka phang, “U Synñiang ki Lad Pathai Khubor sha ka ktien Khasi”.

Ha ka jingrakhe, u Bah Shemborlang Rynjah, CEM, KHADC, Shillong u la wan ban kyrkhu kyrdon ryngkat ki kyntien ai mynsiem kum u Kongsan. Nangta ka Kong M. S. Kharpuri, ophisar ka Tnat Arts & Culture, Shillong ka la wan ban ïashim bynta kum ka Symbud Kongsan. Nalor ka jingkren ki Kongsan ki la ïoh ruh ban sam ïa ka Khusnam Khasi Authors’ Society sha ki 8 ngut ki samla pule kiba ïoh heh duh ki mark ha ka sobjek Khasi ha ka eksamin bapher bapher. Ha kane ka jingïalang, u kongsan u la pyllait paidbah ruh ïa ki 5tylli ki kot ba la thoh da ki dkhot ka Seng; (1) Ka sorkar Jylla Meghalaya – Bah K. W. Nongrum, (2)Ka Poetics u Aristotle ha ka Khasi bad kiwei de ki jingthoh wad bniah – Prof. D.R.L. Nonglait, (3) Ki Khanatang u Hynniewtrep (vol. ii) – Dr. Natalie Jo-Anne Diengdoh, (4) Tang maphi namar jong nga (novel) – Kong Minimon Laloo, bad (5) Ka Snget-Jingmut: Ka bishar bniah halor ki Nobel Khasi – Dr. R. P. Kharshiing.

Ïa ka jingïalang la pynïaid da ka Kong Balarishisha Nongkynrih bad la kren maitphang ïa ka jingrakhe da u Prof. D.R.L. Nonglait, President KAS. Ha ka sienshong kaba ar bad ba lai la pynïaid da ka Dr. Sukjai Swer bad Dr. M.M. Khymdeit. Ki riewshemphang kiba la ai jingkren ha ki ar tylli ki sienshong katkum ki phang ba la shaniah ha ki long;

1. Bah Monarch Shabong – Ka Bynta ki kot khubor ha kaba kyntiew ïa ka ktien Khasi.
2. Prof. Badaplin War – Ka jingpynryntih ïa ka rukom thoh Khasi.
3. Dr. H. H. Mohrmen – Ka jingdonkam jong ka wadbniah ha ki kam pathai khubor.
4. Dr. Medari Janai Tham – Ka jaka jong ka ktien Khasi ha ki rynsan Digital.

Ka jingkren na ki riewshemphang ka la pynrhem shisha ïa baroh kiba don ha ka lympung, ha kaba la batai shai ba ki lad pathai khubor ki long ka atiar bad u synñiang bakhraw ha ka ban pynïar bad kyntiew ïa ka ktien Khasi. Kumta ka long kaba donkam ban kham pynbha ïa ka rukom pathai khubor (print & electronic) ha kaba ka KAS bad MEPA kan ïa kynduh na ka por sha ka por ban wanrah ka jingryntih ha kaba thoh Khasi. Ha kane ka jingïalang la pynbud da ka ka jingïaphylliew jingmut hapdeng ki nongïashim bynta baroh.

Ha kane ka Lympung la pynsngewtynnat shuh shuh da ka jingrwai na ki samla pule ka Shillong Commerce College, Shillong. La ïashim bynta ha ka Lympung da ki dkhot ka KAS, ki dkhot seng bhalang bapher bapher, ki nonghikai bad ki samla pule na ki college bapher bapher kiba don ha Shillong bad kiwei kiwei de ki riew rangbah. Ki Samla kiba la ïoh pdiang ïa ka Khusnam KAS 2024 ki long;

Khusnam Khasi Authors’ Society, 2025
sl.no	Eksam	Sobjek	Kyrteng Khynnah	Kyrteng School/College	% ki Mark
1	SSLC	Khasi (IL)	Olisha Mawiong	K.J.P. Girls’ Higher Secondary School, Shillong	95
2	ICSE (Class X)	Khasi (SL)	Zabediel Badondor Synrem	St. Edmund’s School, Shillong	100
3	HSSLC (Arts)	Khasi (Elective)	Sonaly Marbaniang	St. Paul’s Higher Secondary School, Marbisu	84
4	HSSLC (Arts)	Khasi (MIL)	Maphibanri Majaw	Sacred Heart Boys’ Higher Secondary School, Shillong	94
5	HSSLC (Arts)	Khasi (MIL)	Enrico Shadap	St. Anthony’s Higher Secondary School, Shillong	94
6	HSSLC (Commerce)	Khasi (MIL)	Sophia Niang	Government Girls’ Higher Secondary School, Jowai	92
7	HSSLC (Science)	Khasi (MIL)	Sanida Emi Pakma	St. Mary’s Higher Secondary School, Shillong	96
8	B.A.	Khasi (Hons)	Markos Shylla	King Nongbah Government College, Jowai	74.25

DA KA LYMPUNG ÏAMIR-JINGTIP

PYNLONG KI NONGTHOH KOT KHASI HA KA SNGI U THOMAS JONES

Ka Khasi Authors’ Society ha ka 21tarik Jylliew, 2025 ka la rakhe ïa ka Sngi u Thomas Jones da kaba pynlong da ka Lympung Ïamir-jingtip halor ka phang “U Synñiang u Thomas Jones sha ka Jaitbynriew Khasi” ha St. Edmund’s College, Shillong. Ïa kane ka lympung la pynlong da kaba ïatreilang bad ka Khasi Department, St. Edmund’s College. Ha kaba la ïashim bynta da ki Dkhot ka KAS, nonghikai, samla pule, nongthoh, kynhun Seng Bhalang bad kiwei kiwei; ryngkat ki nongpathai khubor.

Ha kane ka jingrakhe u Bah F.R. Kharkongor, Principal Secretary Arts & Culture Department, Government of Meghalaya, India u la wan ban kyrkhu kyrdoh kum u Kongsan. U kongsan u la kren halor ka jingnoh synñiang u Thomas Jones bad ka jingroi ka ktien Khasi, nangta u la ai ruh ka jingkyrkhu kyrdon ïa ka KAS ha ka jingïaleh jong ka ban pynroi bad kyntiew ïa ka ktien Khasi. Ha kane ka sngi u Kongsan u la pynlait paidbah ruh ïa ka kot ba la thoh da u Bah Kitbok Nongkhlaw, Treasurer KAS kaba la ai kyrteng “Lessons from Carrying the Tortoise”. Ha ka jingïalang la ïoh ruh ka jingkren maitphang da u Vice President ka Seng, Dr. K.D. Ramsiej. Nalor ki jingkren la ïoh ruh ka jingrwai kyrpang na ka kynhun Music Club, St. Edmund’s College, Shillong.

Ha ki sienshong kiba bud, la bteng da ka jingkren na ki riewshemphang; Rev. (Dr.) A. I. Kharshiing halor ka phang, “U Thomas Jones kum u Nongseng Skul”, Fr. (Dr.) Barnes Mawrie halor ka phang, “Ka pule puthi ka atiar ban pynkylla dur ïa ka imlang sahlang u Khasi” bad Prof. D.R.L. Nonglait President, KAS halor ka phang, “U Thomas Jones u paralok ki Khasi pyrshah ïa ki English”. Ka jingkren na baroh lai ngut ki riewshemphang ki la batai bniah halor ka phang ba la bynshet khamtam eh halor u synñiang u Thomas Jones ba u la pynnoh sha ka jaitbynriew Khasi halor ka pule puthi kum u nongseng skul bad u nongpynkylla dur ïa ka imlang sahlang Khasi. Hadien ka jingkren la ïoh ïa ka jingïapylliew jingmut bad ka jingai jingmut halor ka phang ba ki la buh. Ha kaba la ïashim bynta shitrhem da baroh ki nongïashim bynta. Ïa ki jingïalang baroh lai tylli ki sienshong la pynïaid da u Bah Esmarjune Kharpan, Dr. Solony Bareh bad Bah Khrawkupar Kharlukhi.

Thomas Jones came to promote & protect the Khasis not to colonise: KAS

https://unongsainhima.com/2025/06/23/u-thomas-jones-ym-tang-ba-u-wan-kum-u-nongialap-hynrei-ban-shakri-ia-ka-imlang-sahlang-d-r-l-nonglait/?sfnsn=wiwspwa