Rai KA KAS BAN LEIT SHA U PAIDBAH LADA KUMAN KA SORKAR BAN pynlong ktien Sorkar ïa ka ktien khasi ha ka jylla

Ka Khasi Authors’ Society (ka Seng ki Nongthoh Kot Khasi) ha ka 7tarik Jylliew, 2025 ka la pynlong ïa ka Dorbar Pyllun ha Ïing Dorbar Shnong Jaiaw Shyiap – Lumpyllon, Shillong. Ha ka Dorbar la ïoh ban pynsngew ïa ka kaiphot treikam jong ka Seng na ka bynta u snem 2024-2025. Halor ka kaiphot, ka Dorbar ka pynpaw ka jingsngewnguh ïa ki Nongkitkam bad ki dkhot baroh kiba la trei shitrhem ha ka ban pynïaid shaphrang ïa ki ka kam Seng.

Ha ka Dorbar la shim ïa ka rai ban bteng ka jingdawa na ka Sorkar Jylla ban ithuh noh ïa ka ktien Khasi kum ka ktien Sorkar (Official Language) ha ka Jylla kaba la dawa naduh u snem 2023 bad lada ka Sorkar ka kuman ïa ka jingdawa ka Seng kan leit noh sha u paidbah. Nangta ban bteng shuh shuh ka jingpynshai paidbah halor ka ktien Khasi bad ka jingmyntoi lada ka ktien Khasi ka ïoh jaka ha ka Khyrnit baphra. Na ka bynta ka jingdawa na ka Sorkar India, ka Seng ka shaniah ha ka Central Executive Committee, KAS ban nang buddien.  

Ha kane ka Dorbar, la ïoh ruh ban pynithuh bad pdiang ïa ki Dkhot thymmai ka Seng da u President KAS, Prof. D.R.L. Nonglait bad baroh ki don 11 ngut; kiba kynthup ïa u Bah Kitbok Nongkhlaw, Dr. Badahunshisha Jana, Bah Banjop Leo Gregory Kharmalki, Kong Frugiferous Diengdoh, Kong Jennifer Lyngkhoi, Kong Elizabeth Shylla, Dr. Heipor Uni Bang, Dr. Herina Dohtdong, Dr. Rosa Mystica Mawlong, Bah Rangkitbok C. Dohkrut bad Kong Evanisha Pathaw. Ha ka jingkren pdiang ïa ki dkhot thymmai, u Prof. Nonglait u la ong ba watla ha kane ka snem ka seng ka la duh ïa u Bah Maurice G. Lyngdoh u President barim ka KAS, hynrei ka jingpynïasoh thymmai ki 11 ngut sha ka Seng kan ïarap ban pyntyllun stet ïa ki mat treikam ka seng bad ban nang pynkhlaiñ ïa ka thoh ka pule Khasi.

Ha kane ka Dorbar la ïoh ruh ban ai syrnot nam sha ki 2 ngut ki Dkhot ka Seng kiba ïoh ïa ka kyrdan Doctorate hapoh ka snem, kaba kynthup ïa u Rev. (Dr.) Iohborlang Kharshiing bad u Sevendar Dkhar. Kum shi bynta ban pynkhlaiñ ïa ka kam thoh katkum ka jingïaid ka por, khamtam eh ïa ki phang kiba ktah ïa ka imlang sahlang. La ïoh ruh ka jingkren kyrpang na u Prof. D.R.L. Nonglait halor ka phang; ‘Ka Litereshor bad ka bishar bniah’ bad (2) u Slendar Dkhar halor ka phang; ‘Ki snap Jingshisha ka Imlang sahlang ha Ka Jyrsieh Longbriew’.

Ha ka sienshong kaba ar, ka Dorbar ka la ïoh ruh ban pynthymmai ïa ki Nongkitkam bad ki Dkhot ka Central Executive Committee na ka bynta ka samoi treikam 2025 – 2028 kumne harum;

            Ki Dkhot ka Central Executive Committee:

1. Prof. Streamlet Dkhar
2. Prof. Esther J. E. Shongwan
3. Prof. Badaplin War
4. Prof. Desmond L. Kharmawphlang
5. Bah Raphael Warjri
6. Bad baroh ki President na ki hynñiew tylli ki Shnat ka KAS

Auditors: (1) Dr. Davidson Diengdoh bad (2) Dr. Khampher Phawa

Ka Khasi Authors’ Society ha ka 18 tarik Nohprah, 2024 ka la pynlong ïa ka Lyngkhuh Sngi ïap ba 84 u Myllung Soso Tham ha Ri Bhoi College, Nongpoh. Ha kane ka jingrakhe la pynlong ruh ïa ka Lympung Ïamir-jingtip halor ka phang “Ka Mynnor, ka Mynta bad ka Lashai ha ki Poitri Khasi”. Ïa kane ka jingrakhe la pynïaid da ka Khasi Authors’ Society, Shnat Nongpoh ha kaba la ïatreilang bad ka Khasi Department, Ri Bhoi College, Nongpoh. Ha kane ka sngi ki nongshim bynta ki long ki dkhot ka Khasi Authors’ Society, ki nongwad bniah, ki nonghikai bad samla pule jong ka department Khasi na Ri Bhoi College, Balawan College, Northern Ri Bhoi College, Eastern Ri Bhoi College, University of Science and Technology, Meghalaya, bad ki dkhot ka Governing Body Ri Bhoi College, Nongpoh. La kyrkhu kyrdoh ïa ka Lympung Ïamir-jingtip da u Rangbah Mayralborn Syiem, MLA, Nongpoh constituency kum u kongsan.

Ïa ka jingïalang plie la pynïaid da u rangbah Cosmas Rynshon, President KAS, shnat Nongpoh. La dang ïa ka jingïalang da ka jingkren pdiang sngewbha na ka kong Wandashisha Nongkynrih, khliehduh jong ka Department Khasi, Ri Bhoi College, Nongpoh, bad la pynbud ruh da ka jingrwai kyrpang na ki samla pule Khasi Traditional Music, Ri Bhoi College, Nongpoh. Ïa ka jingkren maitphang la kren da u rangbah Phrikshon Kharshiing, Finance Secretary, Khasi Authors’ Society.

Ïa ka Lympung-ïamir-jingtip la pynlong ha ki artylli ki sienshong. Ïa ka sienshong ba nyngkong la pynïaid da u Dr. M. M. Khymdeit, Vice President, KAS, shnat Nongpoh. Ki Riewshemphang kiba la ai jingkren ha kane ka Lympung ki long; (1) Dr. Kampher Phawa uba la ai jingkren halor ka phang bynrap, “Ka jingsynshar nongwei bad ka jingktah jong ka ïa ka jaitbynriew Khasi”, (2) Dr. Walter Thabah u la ai jingkren halor “ka Ri Uzbekistan bad ka shnong Mawphu ha ka poim ‘Ka Biria U Bieit” bad (3) Bobby More Kharbani u la ai jingkren halor “Ka sengpyrkhat halor ka mariang kumba ka paw ha ki poim u Paul Lyngdoh”

Ïa ka sienshong baar la pynïaid da u Dr. R. P. Kharshiing, General Secretary, Khasi Authors’ Society. U riewshemphang, Prof. D. R. L. Nonglait u la ai jingkren halor ka  “Ka Mynnor, ka Mynta bad ka Lashai ha ki poim u D. S. Khongdup”, ka kong Frugiferous Diengdoh ka la ai jingkren halor “ka kylla-ktien ha ki poitri u Soso Tham” bad u bah Esmarjune Kharpan u la ai jingkren halor ka phang “Ka jingktah ka synshar nongwei: Ka jingïohi ki myllung”

Baroh ki jingkren da ki riewshemphang ha baroh artylli ki sienshong ki long kiba myntoi, kiba don jingmut bad kiba ai jingshai. Ha kane ka Lympung la ïashim bynta ruh da ki nongïashim bynta ha kaba ki la buh jingkylli jingshai hakhmat ki riewshemphang bad ki jingai jingmut ban kyntiew ïa ka thoh ka pule khasi lynba ki poitri. La pynkut ïa ka Lympung-ïamir-jingtip da kaba sam ïa ki syrnot bad memento sha ki shongknor bad ki riewshemphang bad ka jingkren ai khublei na u bah Esmarjune Kharpan, Secretary, KAS, shnat Nongpoh.