Ha ka 10.9.2022, ka Khasi Authors’ Society (Ka Seng ki Nongthoh Khasi) ka la rakhe ïa ka lyngkhuh dap snem ba 43. ïa kane ka seng ka ju khot ruh da ka Literary Day ha kaba la pynlong lang ruh ia ka Lympung Ïamir-jingmut (Seminar) halor ka phang “Ka Jingieit Ri u Khasi ha ka Mynnor bad ka Mynta”.

Ïa ka jingrakhe la pynïaid da u Prof. D.R. L Nonglait, President KAS, uba long u Shongknor jong ka jingïalang bad la kren pdiang sngewbha da ka Dr. Barika Khyriem, Treasurer KAS. U kongsan ha kane ka jingrakhe u long u Rangbah D.P. Wahlang, Chief Secretary, Govt. of Meghalaya bad ka Kong Mellisa Kharpuri, ophisar jong ka Arts & Culture, Govt. of Meghalaya kum ka Symbud Kongsan. Nalor ka jingkren ki kongsan la ïoh ruh ka jingsam Khusnam KAS sha ki samla pule ba ïoh heh duh ki mark ha ka sobjek Khasi. Nangta ka jingpyllait paitbah ïa ki Kot ba la thoh da u K.K. Kharlukhi kaba kyrteng Ka Lyngwiar ki Parom, bad ka kot Ka Sneng ka Kraw ha ki Nongthoh Kot Khasi (1888-1919) ba la thoh da u Dr. D. Roy Khongngain. La pynsngaiñ ruh ïa ka jingrakhe da ka jingrwai na ki samla pule ka Seng Khasi College, Shillong.

Ha ka Sien Shong ba I jong ka Lympung Ïamir-jingtip la pynïaid da u Bah Phrikshon Kharshiing, Finance Secretary KAS. La ïoh jingkren na ki arngut ki Riewshemphang kata u Dr. O.L. Snaitang bad u Prof. L.S. Gassah. U Dr. O.L. Snaitang u la ai ïa ka jingthoh halor “Ka History jong ka Jingieit Ri U Khasi naduh ka Mynnor haduh Mynta”, katba u Prof. L.S. Gassah u la ai ka jingkren halor ka phang, “Ka Jingieit Ri u Khasi kumba ka paw ha ka Synshar Khadar”. Ha ka Sienshong kaba II, la pynïaid da ka Prof. Antoinette Kharmalki, Professor, Department Khasi, NEHU, Shillong. La ïoh ka jingkren na arngut ki Riewshemphang bad kita ki long u Prof. O.R. Shallam uba la kren halor ka phang, “Ka Mynnor bad ka Mynta u Hynñiewtrep” bad u Prof. Loniak Marbaniang u la ai ïa ka jingkren halor ka phang, “Ka Bynta Ki Lad Pathai Khubor ha ka Imlang Sahlang”. Hadien ka jingkren la ïoh ruh ka jingïaphylliew jingmut na ki nongïashim bynta baroh.

Ha kane ka jingrakhe kaba i shongkun la wan ban ïashim bynta da ki dkhot ka KAS, Principal Seng Khasi College, Dkhot Governing Body Seng Khasi College, ki dkhot seng bhalang bapher bapher, ki nonghikai, ki samla pule bad kiwei kiwei de ki riew rangbah. Ki kyrteng ki Samla kiba la ïoh pdiang ïa ka Khusnam KAS 2022 ki long;

2022
sl.no	Exam	Subject	Name of School	Name of Students	% of Marks
1	SSLC	Khasi (IL)	St. Anthony’s H/S School, Shillong	Menangmankhraw Kharkongor	98
2	ICSE (Class X)	Khasi (IL)	St. Edmund’s School, Shillong	Alden Kenan Massar	97
3	HSSLC (Arts)	Khasi (Elective)	St. Anthony’s H/S School, Shillong	Anjelus Khongbinan	82
4	HSSLC (Arts)	Khasi (MIL)	St. Anthony’s H/S School, Shillong	Bandarishisha Mawrie	96
5	HSSLC (Commerce)	Khasi (MIL)	Sacred Heart Girls’ H/S School, Shillong	Melboreen Massar	94
6	HSSLC (Science)	Khasi (MIL)	St. Anthony’s H/S School, Shillong	Amy Grace Langstieh	94
7	B.A.	Khasi Hons	St. Mary’s College, Shillong	Wanhunlang Khyllait	80
8	M.A.	Khasi Hons	NEHU, Shillong	Rilarympei Diengdoh	64

Ka Khasi Authors’ Society hapoh ka jingpynïaid ka Shnat Nongstoiñ, KAS ryngkat ka jingïatreilang bad ka Khasi Department, Nongstoin College ka la pynlong ïa ka jingrakhe ïa ka sngi u Thomas Jones ryngkat ka lympung ïamir-jingtip halor ka phang ‘U Thomas Jones bad u synñiang jong u sha ka imlang sahlang U Khasi’. Ïa kane ka program la pynlong ha u bnai Jylliew 22 tarik, 2022 ha Nongstoin College, Nongstoiñ.

            Ha kane ka programme la wan sakhi bad ïashim bynta da ki Dkhot ka KAS, Nonghikai jong ka Nongstoin College, nonghikai bad khynnah pule jong ki khyndai (9) tylli ki College bad Higher Secondary School jong ka West Khasi Hills District, ki nongïalam Niam, ki nongïalam shnong jong ka thaiñ, ki nongïalam Seng Bhalang kum ka KSU, FKJGP, WKSU, bad HYC jong ka West Khasi Hills District, bad ki nongpathai khubor.

Ha kane ka jingrakhe U Rangbah Macmillan Byrsat, MLA Nongstoin Constituency u la wan ban kyrkhu kyrdoh kum u Kongsan bad u Rev. Fr. Anselm Nonglang kum u Symbud Kongsan. Ki riewshemphang ki long u Dr. K. P. Phawa uba la kren halor ka phang “U Thomas Jones bad u synniang jong u sha ka imlang sahlang U Khasi” bad u Rev. A. I. Kharshiing uba la kren halor ka phang ‘U Rev. Thomas Jones, ka ïoh ka kot bad ka khuid ka suba’.Nalor ki jingkren la ïoh ruh ka jingrwai kyrpang na ki samla pule ka Nongstoiñ College, Nongstoiñ.