Ka Seng ki Nongthoh Khasi (Khasi Authors’ Society) ha ka 22tarik Jylliew 2023, ka la rakhe ïa ka Sngi u Thomas Jones (Thomas Jones Day) ha Thomas Jones Synod College, Jowai. Ïa kane ka jingrakhe la pynïaid da ka Shnat Jowai, KAS ryngkat ka jingïatrei lang bad ka Thomas Jones Synod College, Jowai. Ha kane ka sngi la pynlong ruh ïa ka lympung ïamir-jingtip halor ka phang “U Synñiang u Thomas Jones sha ka jaitbynriew Khasi”. U Kongsan ha kane ka sngi, u long u Rev. K. Pariat, Senior Executive Secretary K.J.P Synod Mihngi, ha ka jingkren u la ong ba ka jingwan ïuhkjat u Thomas Jones ha Ri Khasi ka la plie lad plie lynti ïa ka jaitbynriew Khasi ban ïaryngkat kyrdan ha ka jingnang jingstad bad kiwei pat ki jaitbynriew ka pyrthei. Kumta ka donkam ïa ka jaitbynriew ban nang ïai pynkhlaiñ ha ka liang ka thoh ka pule, khnang ba ngin nang ïai kiew ha ka liang ka jingstad. Ha ka sienshong kaba bud la ïoh ka jingkren na ki riewshemphang katkum ka phang ba la buh kumne; Prof. D.R.L. Nonglait – ‘U Synñiang u Thomas Jones sha ka thoh ka tar’ bad Rev. H.C.T Sumer – ‘U Synñiang u Thomas Jones sha ka imlang sahlang’. La pynrhem ruh ïa ka jingrakhe da ka jingrwai na ki samla pule ka Thomas Jones Synod College, Shillong.

Ha kane ka jingrakhe la wan sakhi bad ïashim bynta da ki Dkhot ka KAS, Principal bad Dkhot Governing Body, Thomas Jones Synod College, ki Nonghikai College kiba don ha West Jaiñtia Hills, ki samla pule ba la khot sngewbha na ki shlem pule kiba don ha West Jaiñtia Hills District, ki nongïalam Niam, ki nongïalam shnong jong ka thaiñ, ki nongïalam Seng Bhalang bad ki nongpathai khubor.

Ha ka 17.12.2022 ka Seng ki Nongthoh kot Khasi (Khasi Authors’ Society) ka la pynlong ka jingrakhe ïa ka Lyngkhuh Sngi ïap u Myllung Soso Tham ha Cherra Presbyterian Sec. School, Sohra. Ha kane ka sngi la pynïaid da ka KAS, Shnat Sohra ha ryngkat ka jingïatreilang bad ka Khasi Department, Sohra Government College, Sohra.

Ïa ka jingrakhe la pynlong da ka jingïakob pule poitri halor ka phang “Ki sngi ba la leit noh” na ka bynta ki klas VIII, IX bad X bad ka jingïakob Shad tynrai da ki skul. Hadien ka jingïashim bynta na ki khynnah pule la ïoh ruh ban pynbna ïa ka nam jop kumne;

Ki Nongjop ha ka Jingïakob pule poitri:

Kyrdan	Kyrteng	Skul
Banyngkong	Ms. Ibalabetshuwa Khongngaiñ	RKM HS School, Sohra
Baar	Ms. Haphiiaiphyrnai Pde	St. John Bosco Girlls HS Sschool, Sohra
Balai	Ms. Phibansara Sohkhlet	Rise and Shine LP & UP School, Khliehshnong

Ki Nongjop ha ka Jingïakob shad Tynrai:

Kyrdan	Skul
Banyngkong	Seng Khasi School, Maraikaphon
Baar	Sohra Academy HS School, Maraikaphon
Balai	RKM HS School, Sohra

Ha kane ka jingrakhe la pynlong ruh ïa ka jingïalang paidbah, ha kaba u Prof. D. R. L. Nonglait, President, KAS u la long u Kongsan ha kaba kren ruh ïa ka phang “Ka Ktien Sohra ka hap ha ka Man ba biang sbiak ba u Myllung SosoTham u mih deipor”.Ha ka jingïalang la ïoh ruh ka jingkren na u Bah Wanstep Diengdoh (Vice-President, KAS, Shnat Sohra), Dr. Ronald P Kharshiing, General Secretary KAS, Bah M. Skhembill (President KSU, Sohra Unit) bad Bah Kitbor Nongrum (Dkhot KAS, Seng Kmie). La pynshngaiñ shuh shuh ïa ka jingïalang da ka jingrwai na ki khynnah pule ka Sohra Academy H/S School, Maraikaphon.